Jăt jơnau yal tàm dơ̆ jào pà, priă nàng lơh 1 rơbô 200 nơm hìu ai hìu rơƀah in kờp dŭ geh di pơgăp 96 tơmàn đong. 4 ngân hàng tàm hơ̆ geh Agribank, Vietcombank, Viettinbank mờ BIDV jào pà 60 tơmàn đong, priă gam tai geh mpồl Kwang àng dong kờl.

Tus bal mờ geh jơnau đơs tàm pơrjum, Thượng tướng Lương Tam Quang, Thứ trưởng Ƀộ Kwang àng neh ưn ngài ală cau dong kờl neh lơh broă bal dong kờl priă lơh hìu jào pà ală hìu rơƀah kal ke bè hìu ơm tàm càr Dăk Lăk. Thượng tướng Lương Tam Quang jờng rơ kwang àng càr mờ gơnoar atbồ càr tàm tơngai ờ jŏ neh lơh gơs 2 nơm hìu lài jào pà bàr hìu làng bol gơtìp kal ke bè hìu ơm tàm kơnhoàl Cư̆ Mgar in mờ sồr Kwang àng càr Dăk Lăk bal mờ ală mpồl lơh broă pal lơh jơh 1 rơbô 198 nơm hìu gam tai, lơh kơl jăp mờ lơh gơs lài mờ ngai 31 nhai 10 nam do.