Bơh tŭ gam là kơnòm bơsram kấp pe, bi Hoàng Tiến Dũng neh geh bơta kờñ ngan mờ gah kông nghệ thông tin. Tơnơ̆ tŭ jơh bơsram ơdŭ 12 nam 2003, jat bơta kơ̆p kờñ bơh hìu bơnhă dê, bi mut bơsram tàm Hệ trung cấp Quân lực Hìu bơsram Đại họk Trần Đại Nghĩa mờ jơh bơsram rau den geh mut lơh tàm Mpồl đơng lam ling klàng thị xã Buôn Hồ lơh broă. Tàm mpồl ling, tài bơh geh bơta kờñ uă ngan mờ kông nghệ thông tin, bi geh kấp hơ đang dong kờl pơn jat tai ai lòt bơsram lập trình viên tàm Hìu bơsram Đại họk Khoa học Tự nhiên ƀòn dờng Hồ Chí Minh.

  Jơh bơsram mờ khà jak, bi Hoàng Tiến Dũng sơnđờm lơh jat niam ală jơnau geh bơsram mờ bơta mờng chài neh geh tŭ lòt bơsram bi neh mut lơh tàm bơta geh ngan tàm broă lơh dê. Mìng tàm 4 nam, bi cih 2 phần mềm atbồ mờ dùl jơnau bơceh lơh ding jòm cuh ngui ai ală bơta phàu tiểu liên AK in. Thiếu tá bi Hoàng Tiến Dũng pà gĭt:“Bơta pràn bơh phần mềm dê là dong kờl atbồ làng bol tàm sơnam rcang lòt ling; atbồ geh ală cau là cau gơwèt mpồl rcang lài cau lòt ling, den khà 1, khà 2; dong kờl ai kwang bàng lơh broă lơh sac rơwah ling lơh jat ală jơnau sồr broă lơh”.

Ờ mìng kờñ ngan cih phần mền, Thiếu tá bi Hoàng Tiến Dũng kung jơh nùs ngan tus bal pơgồp bal mờ cau ling bal kơlôi sơnơng bơceh lơh ală broă ngui phàu mờ ală bơta phan tam lơh drơng broă pơlam tàp rcang lài tam lơh. Bồ nam do, bi bal mờ Trung tá ồng Phạm Văn Đông– Kwang atbồ mpồl pơlam broă ling klàng Mpồl đơng lam Ling klàng thị xã Buôn Hồ, kơlôi sơnơng bơceh lơh geh cồng nha ứng dụng “Tơrgùm wơl gùng cuh uă bơta” tàm ding jòm phàu tiểu liên AK đơs bal mờ phàu AR-15. Jơnau bơceh lơh do neh geh kấp ủy Mpồl đơng lam ling klàng thị xã Buôn Hồ, Gah đơng lam ling klàng càr Dăk Lăk sền sơwì ring bal mờ rơ̆p geh ngui uă tàm bơta geh ngan tàm tơngai tus. Trung tá ồng Phạm Văn Đông, đơs:“Gơwèt mờ jơnau bơceh lơh bơh añ dê là tơrgùm broă sền gròi gùng ding jòm klo ngai kung bè trồ mang bơh ală bơta tơrgùm wơl cảm biến bơta àng dê; ai mìng is gơwèt mờ bi Dũng là tiah sền tơrgùm wơl mờ pơyoa rê tàm điện thoại. Bàr tơngume do den tơrgùm wơl gơ gơs jơnau bơceh lơh “Tơrgùm wơl gùng cuh ală bơta”, mờ tus tŭ do añ mờ bi Dũng neh pơgồp bal wơl, den kơlôi sơnơng lơh gơlik geh cồng nha phan bơna hơ̆”.

 Jat Thượng tá ồng Tống Văn Quang– Cíñ trị viên Mpồl đơng lam ling klàng thị xã Buôn Hồ, ală nam pa do, mpồl kwang bàng, cau ling mpồl ling dê sùm lơh pràn lơh jat niam ală tơngume, broă lơh bơto bơtê cíñ trị, bơto bơtê adat boh lam; ai kwang bàng, đảng viên cih mat tus bal, hơ bơto bơtê, bơsram, pơlam tàp jat bồ tơngoh, broă lơh mờ rài kis Hồ Chí Minh dê; tơnguh uă nùs nhơm lơh is tàm kơlôi sơnơng ngui bơta chài măi mok tàm kơnòl broă pơlam tàp rcang lài tam lơh... Bơh tŭ hơ̆ ngai sơlơ geh uă cau dồ nă să is pơn rơ jak mờ gơguh jak ngan tàm uă gah broă lơh, tàm hơ̆ pơn rơ ngan là Thiếu tá bi Hoàng Tiến Dũng mờ ală phần mềm “Atbồ phan tam lơh” mờ “Atbồ làng bol lòt ling”... Ală phần mềm do neh mờ gam geh ngui uă tàm bơta geh ngan, pơgồp bơnah tơnguh uă cồng nha tàm broă lơh kơnòl broă sền gàr Dà lơgar. Thượng tá ồng Tống Văn Quang, đơs bè Thiếu tá bi Hoàng Tiến Dũng: “4 nam pơn jat sùm Dũng là đảng viên sùm lơh sir jak ngan kơnòl broă bơh mpồl ling dê, ai bè ală jơnau bơceh lơh den bi Dũng neh geh Ƀộ Quôk phòng, Quân khu 5 mờ Gah đơng lam Ling klàng càr Dăk Lăk pà ƀằng khen. Ală phần mềm Atbồ rcang lài cau lòt ling mờ bơceh lơh bơh bi Dũng dê ndrờm geh ngui uă ngan tŭ do mờ ală nam pơn jat tai”.

 Mờr 20 nam rềp mềr mờ Mpồl đơng lam Ling klàng thị xã Buôn Hồ dê, Thiếu tá bi Hoàng Tiến Dũng neh mờ gam bơceh lơh uă phần mềm mờ bơceh lơh drơng broă lơh pơlam tàp rcang lài tam lơh geh cồng nha. Mờ ală bơta pơn đơl pràn lơh ngan tàm tŭ lơh broă, bi neh geh kấp ủy ală kấp đơng lam jàu pà uă khà jờng kwơ màng ngan. Mơya, gơwèt mờ bi, khà jờng kwơ màng ngan rlau jơh là bơta pin dờn kờñ gơboh bơh cau rềp bal mờ cau ling bal dê. Do rơ̆p là bơta pơndờm pơnđiang nàng bi in pơn jat tai bơsram, kơlôi sơnơng, lơh geh ală phần mềm geh kwơ rlau tai pơgồp bơnah lơh geh cồng nha kơnòl broă sền gàr Dà lơgar tàm tơngai pa.