Mho ngai 17/04, Mpồl Sồr lơh tơn jơh hìu lơh ing, hìu ồm sèt ñhăt dà mìu càr Dăk Lăk bơyai lơh pơrjum sền wơl bè tŭ tơngai lơh jat tơn jơh hìu lơh ing, hìu ồm sèt ñhăt dà mìu tàm ù tiah càr dê. Tus tŭ do, jơh gùt càr pa lơh mờ lơh niam wơl geh 2 rơbô 400 nơm hìu, mìng lơh geh rlau 40% pơndrờm mờ broă rơndăp lơh geh ai.

Jơnau tờm lơh lơyài tŭ tơngai lam lơh, geh đơs là uă ngan tài bơh broă bè ù ơm ai ală hìu bơnhă gơwèt dong kờl broă lơh dê. Jat broă rơndăp lơh, 7 rơbô 312 nơm hìu rơ̆p geh dong kờl, tàm hơ̆ geh 5 rơbô 891 nơm hìu lơh pa mờ 1 rơbô 421 nơm hìu lơh niam wơl, tam pà gơs 4 mpồl cau: cau geh màng mờ Dà lơgar; hìu bơnhă rƀah, hìu bơnhă pa lik klàs rƀah jat ală broă lơh jơnau kờñ Dà lơgar; mờ ală hìu bơnhă gơwèt broă lơh lam lơh bơh càr dê.