Mờ kơnòl broă bơh he dê neh tam klăc bal, bơtòm tơrgùm bal dong kờl rlau 900 nă oh mi tàm mpồl cau ùr rơhời tam gơl bơta kơlôi sơnơng, broă lơh bơ̆t bơtàu Mpồl mờ ƀòn lơgar tàm xã tiah nhàr lơgar Đăk Dục, kơnhoàl Ngọc Hồi, càr Kon Tum pràn kơldang kơ̆ kơl jăp.

Mpồl Tam klăc cau ùr xã tiah nhàr lơgar Đăk Dục, kơnhoàl Ngọc Hồi, càr Kon Tum geh 9 mpồl mờ rlau 900 nă oh mi cau ùr tàm mpồl. Bơh rlau 7 nam ăt gơnoar broă Kwang ătbồ Mpồl Tam klăc cau ùr xã, bi Y Chon pà gĭt, nàng ală oh mi tàm mpồl cau ùr in bal mờ 98% oh mi cau ùr là kòn cau Jeh Triêng jơh nùs tus bal lơh broă Mpồl, să tờm bi sùm pal lơh krơh, lam lài tàm jơh ală broă, kơnòl broă bơh Mpồl dê kung bè broă lơh cíñ trị, mpồl bơtiàn bơh tiah he dê. Bal mờ hơ̆ là tus tàm tơl thôn, ƀòn, rềp mềl gĭt loh rài kis, bơta kơlôi sơnơng jơnau kơ̆p kờñ bơh tơl nă cau tàm mpồl cau ùr dê.

Tềng đăp bơta geh ngan phan lơh geh bơh sươn sre tìp kal ke tàm broă tăc bro, nam 2019, bi Y Chon hòi jà oh mi cau ùr lơh Hợp tak xã Dục Nông mờ 7 nă cau tàm mpồl, sùm lơh geh broă lơh ai 45 nă oh mi tàm mpồl cau ùr in geh tai priă jền bơh 80 tus 100 tơlak đong pah nam. Kung bè bồ tơngoh kơlôi sơnơng do “Mpồl lơh bal ròng sur sơnràng” geh lơh gơs neh lơh geh broă lơh broă sa sùm ai gĭt nđờ jơ̆t nă cau tàm mpồl in. Bi Y Chon đơs nền, do là ală broă lơh sơnđờm mŭt lơh broă geh cồng nha ngan bơh oh mi tàm mpồl cau ùr tàm tiah he dê. Bi Y Chon yal: Tŭ do, bol añ neh geh ală phan bơna nàng tăc tàm drà. Bol añ ờ mìng tăc ală sur, puăc sur halà sur lơh sơntìl tai mờ bol añ lơh puăc sur hơ̆ gơ gơs phan bơna puăc sur yồng hơđang bơnhă ồs mờ bol añ neh săc rwah phan bơna do nàng lòt pơrlòng phan bơna OCOP kâp càr mờ lơh geh 3 sơrmañ. Tus tŭ do, phan bơna bol añ dê geh drà kờñ ngan niam ngan mờ kwơmàng là ală dơ̆ sa tềp den phan bơna bol añ dê ờ tơl nàng tăc tàm drà in. 

 Bơh cau lam lài là bi Y Chon, ală broă lơh bơh Mpồl Tam klăc cau ùr xã Đăk Dục dê lơh, bè: “Lơh jăt Wa Hồ”, “Gùng lòt bơkàu”, “Pơngàr tơlir”, “Lơh sồ siă gơlik priă”...cèng wơl cồng nha geh kwơ ngan tàm rài kis pơgồp bơnah lơh tam gơl bơta kơlôi sơnơng, broă lơh bơh làng bol tiah nhàr lơgar dê. Bơh broă lơh “Cau ùr sơm băt tê bal bal mờ Cau ling sền gàr tiah nhàr lơgar sền gàr gơnoar tờm ù tiah lơngăp lơngai tiah nhàr lơgar gơ jăt bal mờ sền gàr brê bơnơm geh is mờ tiah ơm kis”, bi Y Chon jơh nùs mblàng yal, hòi jà oh mi tàm mpồl mờ làng bol tơnguh uă bơta gĭt wă tàm broă tus bal sền gàr mờr 8 kơi sồ gùng tiah nhàr lơgar dà lơgar dê rềp nhàr bal mờ lơgar Kộng hoà Zân củ Làng bol Lào mờ lơngăp lơngai rơndăp tăp sèng tàm ƀòn lơgar. Bi Y Chon, yal: Să tờm là cau lam lài kâp mpồl mơkung là cau deh dờng tàm tiah nhàr lơgar, añ gĭt wă loh ngan lơh bè lơi nàng gơtùi sền gàr tiah nhàr lơgar. Añ mblàng yal, hòi jà oh mi cau ùr ờ gŏ di lơh jăt ală broă ờ niam bơh bol iơh dê. Bol añ kung sùm pơgồp bal mờ Pôs đồng Ling sền gàr tiah nhàr lơgar Dục Nông nàng lơh gơ in niam ngan broă lơh mblàng yal hòi jà ai ală oh mi tàm mpồl in mờ digơlan rơ̆p từp tàm bol iơh, hơ̆ sồng làng bol geh jơi nòi tàm lơgar Lào den bol añ kung sùm sền gròi sơl.    

Ală broă lơh cồng nha bơh Mpồl Tam klăc cau ùr xã Đăk Dục dê gam ngai sơlơ đơs nền geh gơnoar broă, broă lơh bơh oh mi cau ùr dê tàm bơ̆t bơtàu hìu bơnhă hờm ram, lơngăp lơngai chờ hờp chờ hờñ mờ tus bal lơh broă mpồl bơtiàn. Bơh khà priă rlau 28 tơmàn đong Mpồl Tam klăc cau ùr xã Đăk Dục ala măt dan càn priă mờ Ngân hàng Cíñ sác Xã hội, bal mờ sùm bơyai lơh bơto pơlam, bơto ngui bơta jak chài măy mok, bơto broă lơh gơ jăt bal mờ yal tơngĭt, lơh geh broă lơh...mờr 590 hìu bơnhă cau tàm mpồl cau ùr tàm xã Đăk Dục neh tơnguh tai geh priă lơh geh. Kwơmàng geh 22 hìu bơnhă cau tàm mpồl cau ùr rƀah geh Mpồl dong kờl neh lik klàs rƀah kơ̆ kơl jăp ngan. Mò Y Phương, Kwang ătbồ Mpồl Tam klăc cau ùr càr Kon Tum jờng rơ ngan ală tă pơgồp bơh bi Y Chon dê gơ wèt mờ broă lơh Mpồl tàm xã tiah nhàr lơgar Đăk Dục, kơnhoàl Ngọc Hồi, càr Kon Tum. Mò Y Phương, đơs: Bi Y Chon là dùl tàm ală kwang bàng Mpồl là làng bol jơi bơtiàn dùl êt nă cau tơryăng tơryồng, jơh nùs jơh tồr ngan, khin kơlôi mờ khin ngan lơh. Bi sùm kơlôi sơnơng, lùp bơsram, sền swì sră nggal sồr lơh bơh kâp hơđang dê mờ lơh jăt jơnau sồr bơh kâp ủy dê, pơgồp bal niam ngan mờ gơnoar ătbồ xã mờ ală gah lơh broă bal mờ mpồl cau bơh xã dê gĭt nền broă gơlik geh bơh cau tàm mpồl cau ùr dê nàng lam lơh jăt kơnòl broă bơh Mpồl dê mờ neh cèng wơl cồng nha geh kwơ ngan gơhòi gơ jà, bơtòm tơrgùm uă ngan cau ùr tàm mpồl tus bal.

Bơh bơta jơh nùs jơh tồr, geh kơnòl ngan mờ broă lơh Mpồl bơh bi Y Chon dê, ală srơh, ală broă lơh bơh Mpồl Tam klăc cau ùr xã Đăk Dục dê ngai sơlơ gơhòi gơ jà geh gal ngan oh mi cau ùr mờ làng bol tàm xã tus bal. Mpồl Tam klăc cau ùr xã neh tơmŭt tai tàm mpồl cau ùr geh 210 nă, geh 100% broă rơndăp lơh dê jàu; yal tơngĭt 16 nă cau jak ngan tàm mpồl cau ùr ai Đảng in sền swì mờ tơmŭt Đảng...Să tờm bi Y Chon sùm geh Mpồl Lơh jăt Đảng ƀộ xã Đăk Dục pà Sră jờng rơ lơh geh sră jờng rơ Đảng viên lơh gơs jak ngan kơnòl broă; geh gơnoar ătbồ, mpồl cau ală kâp pà uă Sră jờng rơ dờng dềt. Nhai 6 pa do, bi Y Chon chờ hờp geh 1 tàm 5 nă cau bơh càr Kon Tum geh ai lòt tus càr lơgar Hà Nội lòt Pơrjum jờng rơ, pơn jờng cau pơnrơ jak gùt lơgar di tơngkah kir sơnrai 75 nam Ngai Củ tịc Hồ Chí Minh geh Jơnau hòi jà tàm pơrlòng kờñ gơboh dà lơgar. Pơrjum bơh Mpồl duh broă Tàm pơrlòng- Jờng rơ Dà lơgar dê bơyai lơh.