Rơndăp broă lơh RECAF geh lơh tàm 6 nam tàm ală càr Dăk lăk, Gia lai, Lâm Đồng mờ Khánh Hoà, tơrgùm dong kờl tam gơl broă lơh sa jăt broă lơh sa suơn sre brê bơnơm pơgồp bal lơh kơl jăp, tơnguh broă sền gàr brê hòn is mờ bơtàu tơnguh ală mpồl geh kwơ ờ lơh gơtìp roh brê.

Jăt broă rơndăp lơh geh ai, rơndăp broă lơh rơ̆p pơgồp bal lơh gơmù tàm pơgăp 6,68 tơlăk tấn nhơm CO2 ndrờm bal, tam gơl 145 rơbô lồ ù brê nàng lơh ală mpồl lơh broă sa suơn sre brê bơnơm pơgồp bal lơh kơl jăp mờ sền gàr tàm pơgăp 500 rơbô lồ brê hòn is geh bơta kwơ uă. Rơndăp broă lơh RECAF kờp dŭ cèng geh wơl bơta kwơ tơn ai rơlao 420 rơbô nă làng bol in mờ lơh geh bơta gơrềng bal niam tus rơlao 1 tơlăk nă cau dờp bơta kwơ bal, pơgồp bal gàr niam ờ geh cau gơtìp sơrbì is hờ tơnơ̆ tàm broă tam gơl tơlir mờ bơtàu tơnguh kơl jăp.