Bal mờ gùt lơgar, dơ̆ pơrlòng jơh bơsram kấp pe nam 2024, geh bơyai lơh bơh ngai 26 tus ngai 29 nhai 6, càr Dăk Lăk geh mờr 21 rơbô nă cau pơrlòng tus pơrlòng tàm 33 anih pơrlòng mờ rơlao 870 jơdŭ pơrlòng tàm jơh ală kơnhoàl, thị xã, ƀòn dờng. Rơlao 2 rơbô nă kwang bàng, cau pơgru sền pơrlòng, jăt sền mờ drơng broă tàm ală anih pơrlòng.

Tus tŭ do, càr Dăk Lăk neh rơcang lài bơyai lơh dơ̆ pơrlòng di jăt broă rơndăp lơh geh ai mờ jơnau lơh nền bơh Ƀộ Bơto bơtê mờ Bơsram neh ai, wèt tus dùl dơ̆ pơrlòng lơngăp lơngai, niam, geh cồng nha uă. Broă rơcang kơrian kòp gơtờp, kloh niam tiah kis, kloh niam phan sa, dong kờl kàl pơrlòng, dong kờl kơnòm bơsram tus pơrlòng, cau hìu nhă cau pơrlòng kung geh Mpồl đơng lam dơ̆ pơrlòng ală kấp lơh jăt mờ geh gùng dà broă lơh bơh gờñ tàm broă pơgồp bal. Broă gàr niam bơta lơngăp lơngai dơ̆ pơrlòng geh sền gròi ngan. Jăt Đại tá Nguyễn Hữu Lương, kwang atbồ cơl dŭ lơh broă Sền gàr lơngăp lơngai Cíñ trị tàm dơlam is (PA03), gơwèt kwang àng càr Dăk Lăk yal, gah kwang àng bơh gờñ neh lơh broă rơndăp lơh pơgồp bal nền nòn mờ ală gah lơh broă nàng rơcang lài tàm ală gùng dà broă lơh sền gàr bơta lơngăp lơngai ai dơ̆ pơrlòng in.