Thiếu tá ồng Vũ Hồng Hiến, atbồ Mpồl K51 pà gĭt, ù tiah jòi tơrgùm ƀồc ntìng cau ling chơ̆t màng tàm ù tiah Campuchia sùm là dòr bơnơm ngòt rơngơ̆t, kal ke mờ uă ngan là lòt jơng lơm, geh tiah mìng gơtùi lòt mờ gùng dà lơm. Bơdìh ală phan ngui ià tê, tơl nă cau ling tàm mpồl sùm at bal phan sa tơl sa bơh 7 tus 10 ngai. Tàm gùng lòt jơ̆t rơbô cơnđoà lòt jòi cau ling chơ̆t màng, geh uă ngan dơ̆ lòt ờ geh cồng nha lơi, mơya kung geh ală dơ̆ bơtoah ngan sơl, jòi gŏ geh mpồl ling bal mơkung jòi geh uă phan kir sơnrai. Thiếu tá ồng Vũ Hồng Hiến, đơs:“Lòt is, dùl mpồl den 2, 3 nă oh mi. Tŭ he tờ jòi, gŏ geh toal tah pồt kơ̆ bơh ală wa dê den đơs lơs ngan. Do rao, wa do rao! Tŭ sền gŏ uă bơta ngoh rơngăc mờ nàng đơs mờ bơr den kal ke ngan. Ngan ngồn là tŭ tờ bơtô ƀồc bơh ală wa rao, geh wa gam wơl dồ ết siñ phẩm, ai bàr pe bồc ntìng ờ gam geh bơta lơi tai, mìng geh dồ ết tàm hơ̆ là ală kơcing ao halà bàr pe phan bơna lơm. Hơ̆ là bơta jê sồt muăt jrùm ngan”.

 Bal mờ broă lơh lòt jòi, rồ tơrgùm ƀồc ntìng cau ling chơ̆t màng, kwang bàng, cau ling Mpồl K51 Dăk Lăk gam lơh niam ngan broă lơh hòi jà làng bol tàm ală tiah lơh pôs đồng mờ broă lơh ling klàng đah bơdìh, cribơyai broă mờ gơnoar atbồ, lơh jat niam bơta gĭt gơ̆p mờ làng bol bơyô dê. Ală bi sùm pà phan dong kờl làng bol bơyô in bơh broă còp, pà phan, kham sơm kòp mờ pà sơnơm ờ sa priă ai làng bol in. Bơh hơ̆, uă làng bol neh yal ai Mpồl in uă jơnau yal geh kwơ ngan. Thiếu tá ồng Nguyễn Văn Duẩn, cau ling tàm Mpồl K51, đơs: “Làng bol khi đềt mềr mờ he yal, dong kờl, uă tŭ khi gam hòi jà cau pròc mhàm bal tus bal lòt jòi mờ dong kờl Mpồl nàng jòi gŏ ƀồc ntìng cau ling chơ̆t màng chơ̆t phi să tàm ù tiah lơgar Campuchia dê. Uă làng bol tŭ bol añ jòi gŏ ƀồc ntìng cau ling chơ̆t màng den ngoh rơngăc ngan, mờ tŭ bol hi rê wơl bol khi kah sùm. Tŭ bol añ tus làng bol gơlơh bè ală cau  pròc mhàm bal, gơlơh bè là lài do là cau ling Wa Hồ tus nàng dong kờl làng bol Khmer lik klàs bơh rài gơ sơ̆t rung Pol Pot dê”.

Mpồl K51 geh kơnòl broă lòt jòi tơrgùm ntìng ƀồc cau ling chơ̆t màng tàm tiah 4, ală kơnhoàl: Bátchanđa, Cônhét, Keosama, Ôrăng mờ ƀòn dờng Senmônôrum  gơwèt càr Mundulkiri (lơgar Campuchia). Do là tiah kơh bơnơm, ù tiah dờng ơnàng kal ke, gùng lòt rê kal ke, trồ tiah ro kơñ rañ ngan. Thượng tá ồng Trịnh Ngọc Kiệm, Kwang atbồ Mpồl K51 pà gĭt, mìng geh dùl ết jơnau yal lơm, bulah ết ngan mờ ơm ngài gĭt nđờ rơhiang kơi sồ, Mpồl kung lòt gùng mơ:“Tiah lơi geh jơnau yal den tàm hơ̆ geh mat kwang bàng, cau ling dê, mờ tơl broă lơh sơr lèt gan kal ke bòl glar, nàng sền gĭt, lòt jòi, tơrgùm ƀồc ntìng mờ bơsong ală jơnau yal. Tŭ sền gơ lơh tờ gŏ, jòi geh tềl lời wơl bơh kwang bàng, cau ling chơ̆t màng dê den tơl bơta bòl glar, ală bơta kal ke bòl glar geh bơtơl wơl”.

Tŭ tơngai 23 nam pơnđơl pràn lơh ngan lòt jòi mpồl ling chơ̆t màng tàm lơgar Campuchia bơh Mpồl K51 dê neh jun geh 746 ƀồc ntìng cau ling chơ̆t màng rê wơl mờ ù mè Việt Nam dê. Mò H’Yim Kdoh, Phó Củ tịc Ủy ƀan Ñân zân càr Dăk Lăk đơs nền, ală bơta pơn đơl pràn lơh ngan mờ cồng nha lòt jòi tơngai pa do bơh Mpồl K51 dê neh pơgồp bơnah dờng ngan lơh tơrmù ƀà ală bơta jê sồt roh rui gơwèt mờ cau pròc mhàm ală hìu bơnhă cau ling chơ̆t màng dê; tơngŏ nùs nhơm “Hùc dà kah tô dà”, “Sa plai kah cau tam chi” bơh jơi bơtiàn he dê, cèng wơl bơta kwơ niam bơnĕ uă ngan. Mò H’Yim Kdoh, đơs:“Pơn yờ să ngan mờ sền dờng màng ală bơta pơn đơl pràn lơh ngan bơh oh mi dê. Añ dòn ngan là mờ bơta sền gròi uă ngan bơh Tỉñ ủy, Hội đồng Ñân zân, Ủy ƀan Ñân zân, Ủy ƀan Ñân zân Mặt trận Dà lơgar Việt Nam càr mờ is ồn ngan là ală nùs nhơm uă ngan bơh ală jơi bơtiàn tàm càr dê lời ai kwang bàng, cau ling Mpồl K51 in ờ mìng là nùs nhơm, bơta kờñ gơboh, pin dờn mờ rlau tŭ lơi jơh là bơta kơ̆p gơn nàng khi in lơh jat kơnòl broă dờng màng tàm ù tiah gơ̆p bơyô dê”.

Mờ kơnòl broă dờng màng uă ngan, ală cau ling Mpồl K51 Dăk Lăk gĭt nđờ rơnàng sùm sơr lèt gan tơl bơta kal ke. Ală broă lơh ngềt ngơ̆t, bềng bòl glar kal ke, mơya pơn yờ să uă ngan bơh kwang bàng, cau ling Mpồl K51 dê geh uă ală dà kơl hề bal mờ ală dà mat hờn chờ tŭ jòi geh ƀồc ntìng bơh ală wa, ală bi dê nàng jun khi rê wơl mờ ù mè tờm.