Kờp dŭ broă dong kờl kàl pơrlòng bơh Đoàn ơruh pơnu Kộng sản Hồ Chí Minh càr Gia lai geh sơn đờm bơh drim ngai 26 nhai 06, tus jơh dơ̆ pơrlòng là ngai 29 nhai 06.

Jăt broă rơndăp lơh, geh 310 nă ơruh pơnu lơh broă nùs nhơm dong kờl geh tam pà gơs 41 mpồl, lơh kơnòl broă tàm 41 anih pơrlòng, tàm 17 kơnhoàl, thị xã, ƀòn dờng tàm gùt càr. Ală mpồl ơruh pơnu lơh broă nùs nhơm dong kờl geh  rò cau pơrlòng tàm ală anih pơrlòng, dong kờl pơlam, lam gùng lòt; dong kờl cau pơrlòng tàm broă ntrờn bơh anih pơrlòng tus hìu ơm; jòi, yal hìu ơm ơpah ờ sa priă ha là sa priă ờ kas; jòi hìu sa tơl kloh niam phan sa. Bal mờ hơ̆ tàm ală gùng tờm mŭt tàm anih pơrlòng, ơruh pơnu lơh broă nùs nhơm dong kờl kung pơgồp bal mờ mpồl lơh broă geh gơnoar nàng tam pà gùng lòt, gàr gùng geh lòt niam.