Rlau 70 sơnam, mơya ồng Ma An ơm tàm ƀòn Trí A, xã Krông Na, kơnhoàl Buôn Đôn,c àr Dăk Lăk kung gam ngac ngar ngan, să jan jù, kràñ, pràn kơldang bè tờm jrê ơm ntàu kơ̆ tàm gùl ù tiah brê bơnơm dờng ơning ơnàng Tây Nguyên. Nam 2002, Tây Nguyên gơ gơs dùl tiah gơlik geh bơta ờ niam bè cíñ trị mờ bơta geh mat bơh dùl mpồl pơr lơ̆ dră dê, ồng Ma An gơ gơs là anih kơldìng bè nùs nhơm bơh làng bol gùt ƀòn dê. Jơh dùl tŭ tơngai jŏ jòng, gròi sền tơl hìu bơnhă, ồng kơ̆ dơn mblàng yal, hòi jà, bơto bơtê làng bol git loh muh mat ngan bơh ală bol pơr lơ̆ dră dê nàng tơl nă cau in tơnguh nùs nhơm rơcang ngac, bañ iat jơnau bơ chồt bơh bol ờ niam dê: “He ơm tàm do den bañ iat halà đòm jat bol ờ niam, he pal sùm git loh bơta đơng lam bơh Đảng, broă dong kờl bơh dà lơgar dê, sùm đềt mềr mờ gùng dà bơh Đảng dê, nàng lơh bè lơi kis gơ in niam mờ ƀòn lơgar he dê”.

Tŭ tiah ờ niam bè broă cíñ trị neh gơ rê wơl ring lơngai, cau kra ƀòn, cau geh bơngă pin dờn pơn jat tai là krơh niam tàm broă lơh jat niam gùng dà, broă dong kờl bơh Đảng, adat boh lam dà lơgar dê. 54 nam ơm tàm mpồl cau geh Đảng, ồng Y Thương K’Măn ơm tàm xã Bông Krang, kơnhoàl Lăk, càr Dăk Lăk sùm tus bal ală dơ̆ pơrjum tàm ƀòn, hòi jà làng bola lă jơi bơtiàn kòn cau lơh jat niam broă lơh, adat boh lam bơh dà lơgar, jơh nùs bơt bơtàu mpồl tam klac dờng gùt jơi bơtiàn. Ồng Y Thương pà git, bulah dà lơgar ngai sơlơ bơtàu tơnguh mơya rài kis bơh làng bol ală jơi bơtiàn dùl êt nă cau dê kung gam uă kal ke, ală mpồl sò tơm kung gam sơmờm tàm bơta do nàng pơn jồ làng bol dră wơl cồng nha kac màng. Den tàng ală cau Đảng viên bè ồng pal là cau tờm, là anih kơldìng kuơmàng nàng làng bol kòn cau he in đòm jat: “Đảng mờ dà lơgar sền gròi ngan tus rài kis làng bol jơi bơtiàn dùl êt nă cau dê tàm uă bơta, lài ngan là ồs đèng den hìu lơi kung geh lơm, dơ̆ 2 là lòt kham kòp den ờ roh priă jền. Ală bơta hơ̆ là bơta sền gròi bơh Đảng, bơta dong kờl bơh dà lơgar dê neh sền gròi tus làng bol jơi bơtiàn dùl êt nă cau bol he in”.

Mờ bơngă pin dờn he dê, uă cau kra ƀòn gam hòi jà làng bol pơgồp bal bơtàu tơnguh lòt nhơl mpồl bơtiàn mờ prap gàr bơta niam chài kòn cau. Jat ồng Y Nuel Niê ơm tàm ƀòn Akor Dhông, ƀòn dờng Buôn Ma Thuột, càr Dăk Lăk đơs, broă lơh do ờ mìng dong làng bol sơlơ kờñ rlau tai, sền dờng màng bơta niam chài bơh yau jơi bơtiàn kòn cau dê, mờ gam dong khi geh tai priă jền nàng geh rài kis lơngăp lơngai, kơ̆ kơljap: “Prap gàr niam chài bơh yau gơtùi lơh gơlik ală bơnah priă jền nàng bơcri ai kòn sau in bơsram sră kung bè ai geh broă lơh oh kòn tàm ƀòn in. Lơh wơl, yal tơnggit niam chài kòn cau Rơđê, ờ mìng ai nac tàm lơgar in mờ gam lơgar ndai in tai. Bơtàu tơnguh bơta niam chài gơ jat bal mờ lòt nhơl nàng lơh geh priă jền làng bol in”.

Tây Nguyên tŭ do geh rlau 3 rbô 700 nă cau kra ƀòn, cau geh bơngă pin dờn, khi ờ mìng là ală rùp pơn rơ bơh bơta niam chài tàm ƀòn lơgar dê mờ gam là rbàng tơrbŏ bơh gơnoar atbồ dê tàm broă mblàng yal broă lơh, adat boh lam, lam lài tàm broă lơh jat gùng dà, pơgồp bơnah gàr kơ̆ kơljap rài kis mờ sền gàr lơngăp lơngai tàm ƀòn lơgar.