Tàm pơrjum, ală kwang bàng tàm Mpồl neh mblàng sền ală jơnau kờñ, kơnòl broă gơ ai tơlik tàm jơnau rơcăng cih Broă rơndăp lơh jŏ jòng. Jăt mờ hơ̆, tàm Kơrnoăt 29 bơh Ƀan Câp hàñ Đảng Dà lơgar khoă XI dê geh ală jơnau kờñ gam di gùng, di tơngai den tàng kờñ pal tàm pơdờn đòm jăt; mpồl jơnau kờñ ờ hềt tam toh, ờ hềt di halà broă lam lơh ờ hềt tơl làm, ờ gơtùi lơh jăt ngan ngồn. Mờ Broă rơndăp lơh jŏ jòng kung kờñ pal ai geh ală jơnau kờñ pa, broă lơh tam gơl mhar nàng kờñ lơh geh jăt jơnau sồr cau lơh broă tŭ do dê.

Đơs tàm dơ̆ pơrjum, Phó Thủ tướng, Kwang ătbồ Mpồl duh broă Dà lơgar Bơto bơtê mờ Bơtàu tơnguh cau lơh broă đơs loh, Broă rơndăp lơh jŏ jòng bơtàu tơnguh bơto bơtê tơngai tus nam 2030 mờ bơta wèt sền tus nam 2045 geh gơnoar broă kwơmàng, gơrềng uă tus broă dong kờl bơto bơtê mờ bơtàu tơnguh mpồl cau lơh broă tàm rài tơnơ̆ do. Tài bè hơ̆, Broă rơndăp lơh jŏ jòng pal geh bơta krơi is, kơnòl broă tờm, bồ tơngoh kơlôi sơnơng tờm ngan; kơ̆ nùs pơlam gùng dipal mơya kung geh bơta tam gơl, tam gơl pràn.