Là kòn cau KDong deh mờ dờng tàm ƀòn Đắk Wang, xã Sa Loong, kơnhoàl Ngọc Hồi (càr Kon Tum), nam 19 sơnam Y Trang geh Kông ty 732 dờp mut lơh kông ñân. Tơnơ̆ tŭ geh bơto bơtê bè bơta chài còr bơsơ̆t kau su, bi Y Trang geh dờp apah 3 lồ. Rlau 10 nam rềp mềl mờ kông ty, tŭ do rài kis hìu bơnhă bi Y Trang dê neh bè ờs wơl. Bàr dơ̆ pơn jat sùm Y Trang geh jờng rơ là dùl tàm 4 nă kông ñân bơh Kông ty dê tus bal dơ̆ pơrlòng cau lơh broă jak gùt Ƀiñ đoàn. Bi Y Trang pà gĭt, bơdìh mờ 3 lồ kao su dờp lơh apah, ùr bơklau bi gam geh 1 lồ kơphê tai. Ngan là kơnờm tàm broă mut lơh kông ñân den ùr bơklau bi dê geh tơl ală bơta lùp bơsram, sơng ka sền gàr suơn kơphê den tàng geh cồng nha tơnhào uă.

Bi Y Trang, đơs: “Tŭ geh sac rơwah mut lơh kông ñân bơh Kông ty 732 dê, kông ty pờ ơdŭ bơto broă còr bơsơ̆t kau sau. Tơnơ̆ tŭ gơ gơs cau còr bơsơ̆t kao su, añ geh dờp apah suơn chi. Gơ gơs kông ñân bơh Kông ty dê, añ geh priă lơh geh sùm, tơl ngui tơl sa tàm rài kis. Gơwèt mờ ală hìu bơnhă kal ke, Kông ty dong kờl pà phan ngui sa nàng khi in ờ siơ̆u phan sa tàm ală ngai puh pah. Pơndrờm mờ ală cau ndai tàm ƀòn mờ ờ mut lơh kông ñân den rài kis bơh bol añ dê geh tơl làm rlau uă ngan”.

Hìu bơnhă ồng Nguyễn Công Hoàn, ƀòn tờm tàm càr Thái Bình mut tàm xã Đắk Kan, kơnhoàl Ngọc Hồi, càr Kon Tum mut lơh broă mờ 2 mpàng tê gời. Geh bơta dong kờl bơh Kông ty 732 dê, hìu bơnhă ồng hời rơ hời brồ guh, lơh hìu dờng niam. Bơ ùr ồng dê là kông ñân Kông ty 732, tŭ do gam dờp 5 lồ 5 sào kau su nàng sơng ka sền gàr. Hìu bơnhă gam geh 1 lồ kau su mờ 1 lồ kơphê. Tŭ do, ồng Nguyễn Công Hoàn là kwang đơng lam bồ Mpồl duh broă atbồ Hợp ták xã drơng broă lơh sa suơn sre Đăk Kan, mờ 400 nă cau lơh broă, tàm hơ̆ lơh 80 lồ kòi sre. Ƀlàng sre lơh kòi do kung là Kông ty 732 rồ lơh is den hơ̆ sồng ai ală hìu bơnhă in dờp apah.

Ồng Nguyễn Công Hoàn, đơs: “Tàm Ngọc Hồi bol añ den uă ngan jơi bơtiàn kòn cau tàm tiah đah Tô dà lơgar, tiah đah Jum tus tàm do ơm kis. Tàm xã Đăk Kan uă ngan làng bol kòn cau dùl ết nă cau tàm ală tiah, den sùm geh kông ty dong kờl. Bơh broă lơh gùng lòt, lơh phan bơna ƀòn lơgar, dong kờl làng bol kòn cau tàm broă lik klàs rƀah, lơh geh broă lơh ai ơruh pơnu, oh kòn làng bol kòn cau dùl ết nă cau in. Den tàng lơh sa tàm xã Đăk Kan bol añ dê bơtàu tơnguh ndrờm bal đau. Lơh geh bơta hơ̆ là kơnờm bơta dong kờl bơh Kông ty 732 dê”.

Kông ty TNHH MTV 732 atbồ 2 rơbô 330 lồ kau sau, rlau 80 lồ kòi sre, 1 nơm Hìu măy lơh gơlik bơsơ̆t kau su lơbơn mờ bơta pràn lơh gơlik 5 rơbô tấn bơsơ̆t ro dùl nam. Cồng nha tơnhào bơsơ̆t ro pah nam sùm lơh geh mờ sơr lèt broă rơndap lơh bơh Ƀiñ đoàn dê jàu. Kông ty neh lơh geh broă lơh, priă lơh geh sùm ai mờr 1 rơbô 500 nă cau lơh broă in, tàm hơ̆ geh nggùl là kông ñân làng bol kòn cau dùl ết nă cau. Kông ty kung neh lơh ngan mblàng yal, hòi jà kông ñân mờ làng bol tàm ù tiah do dê lơh jat niam ală gùng dà broă lơh bơh Đảng, adat boh lam bơh Dà lơgar dê. Kông ty gam bơcri priă lơh hìu niam chài, hìu bơsram, hìu ròng kơnòm dềt, tiah nhơl niŏ chờ hờp; kham, sơm kòp, pà sơnơm ờ sa priă ai làng bol in.

Đại tá ồng Hà Văn Nam, Ƀí Thư Đảng uỷ, Phó Kwang atbồ Kông ty 732, đơs: “Kông ty 732 lơh jat kơnòl broă kwơ màng tàm ù tiah đah tô Tây Nguyên dê. Lơh tàm ù tiah 4 xã gơwèt 2 kơnhoàl Ngọc Hồi mờ Sa Thầy, càr Kon Tum; lơh jat kơnòl broă bơtàu tơnguh lơh sa- mpồl bơtiàn sền gàr niam Dà lơgar, lơngap lơngai tàm tiah do dê. Kông ty sùm sền gròi, dong kờl lơh geh broă lơh sa ai làng bol kòn cau dùl ết nă cau in, ngan là làng bol kòn cau ơm tàm tiah do, tŭ do Kông ty neh sac rơwah mŭt lơh kông ñân rlau 50%. Priă lơh geh bơh cau lơh broă dê geh mờr 9 tơlak đong pah nhai. Kông ty neh lơh niam broă lơh dong kờl, gàr niam rài kis mpồl bơtiàn ờ mìng tàm kông ñân lơm mờ jơh bal làng bol tàm ù tiah do dê, ngan là ală hìu bơnhă geh rài kis kal ke den kông ty neh di tŭ dong kờl, lơh geh tơl ală bơta ai làng bol in geh rài kis bè ờs wơl. Kông ty sền gròi lơh niam bơta gĭt gơ̆p tam klăc bal mờ kấp ủy, gơnoar atbồ mờ làng bol tiah do dê. Ngan là pơgồp bal mờ ală mpồl ling phàu crong tàm ù tiah do sùm lòt sền, gròi sền tàm tiah nhàr lơgar, ờ geh cau lơi lòt gan tiah nhàr lơgar tìs mờ adat boh lam”.

Mờ ală cồng nha neh lơh geh, Kông ty 732 neh geh Củ tịc lơgar pà sră jờng rơ Cau ling khin cha jak chài Lơh broă tàm rài tam gơl pa. Uă mpồl ling, cau dùl nă să bơh kông ty dê kung geh dờp ală phan pà kwơ màng bơh Ƀộ, ngàñ mờ Ƀiñ đoàn 15 dê. Mơya gơwèt mờ kwang bàng, kông ñân bơh Kông ty 732, ală cau neh tam klăc bal rềp mềl mờ ù tiah “dùl dơ̆ iar nrau 3 lơgar iăt bal” do, phan pà geh kwơ ngan rlau jơh hơ̆ là nùs nhơm pin dờn, là tiah kơldìng kơ̆ kơl jap ai làng bol ală jơi bơtiàn kòn cau tiah nhàr lơgar bơh Dà lơgar dê in.