Tàm 4 nam, càr Dăk Lăk neh bơcri rơlao 2 tơmàn 100 tơlăk đong lơh jăt broă lơh do. Bŭ lah gam ờ uă bơta gơkòl, mơya broă lơh do neh lơh geh cồng nha niam tŭ tơrmù geh nggùl khà hìu rơƀah tàm tiah làng bol jơi bơtiàn ờ gal cau, gơmù gam 13,7% tàm lồi nam 2024.

Càr Dăk Lăk neh dong kờl rơlao 1 rơbô hìu lơh hìu ơm; bơcri priă lơh pa mờ lơh niam wơl mờr 550 broă lơh phan bơna geh kwơ; bơyai lơh git nđờ jơ̆t ơdŭ bơto nàng git sră, bơto broă lơh, bơtàu tơnguh lơh sa mờ lơh geh wơl ală bơta kwơ niam chài ờs mờng. Càr dan mờ Cíñ phủ gờñ tam pà bơnah priă bơtàu tơnguh gam ờ tơl jăt broă rơndăp lơh, sền wơl tơnguh khà priă dong kờl ù lơh hìu ơm, hìu ơm, ù lơh sa, dà ngui sa di pal mờ mùl màl. Càr Dăk Lăk kung dan lơh niam wơl broă ai càn priă sa priă cồng ờ uă mờ pơgồp bal di pal rơlao đah ală broă lơh jăt jơnau kờñ dà lơgar dê nàng tơnguh uă cồng nha.