Thị xã Buôn Hồ, càr Dăk Lăk geh rơlao 100 rơbô nă, mờ 25 jơi bơtiàn ơm kis bal, tàm hơ̆ geh mờr 31% là làng bol jơi bơtiàn ờ gal cau. Lơh jăt broă kòn cau mờ broă dong kờl kòn cau, tàm 05 nam do, thị xã Buôn Hồ neh bơyai lơh 20 dơ̆ pơlam, yal broă lơh, lòt lơh broă hờ lơgar bơdìh mờ mờr 3 rơbô nă cau tus bal, tàm hơ̆ geh nggùl là làng bol jơi bơtiàn ờ gal cau. Bơyai lơh 27 ơdŭ bơto broă lơh ai mờr 1 rơbô nă cau lơh broă tàm ƀòn là làng bol jơi bơtiàn ờ gal cau gơwèt hìu rơƀah, hìu ndrờm rơƀah kờñ bơsram broă lơh. Ală nam do, thị xã Buôn Hồ geh tam pà mờr 20 tơmàn đong nàng lơh ală rơndăp broă bơcri priă, bơ̆t bơtàu phan bơna ai ală ƀòn in, bơsong ù lơh hìu ơm, hìu ơm, ù lơh sa, dà ngui sa ai ală ƀòn gơtìp kal ke mờ dong kờl bơto broă lơh ai ơruh pơnu in.

Gùng lòt tus tàm ală xã geh lơh kơl jăp; jơh ală làng bol geh ngui ồs đèng mờ dà sàng kloh niam. Broă prăp gàr mờ ngui bơta niam chài geh sền gròi mờ bơcri priă lơh. Broă bơ̆t bơtàu mpồl lơh broă cíñ trị pơgồp bal mờ bơto, bơto bơtơl, bơ̆t bơtàu mpồl kwang bàng là làng bol jơi bơtiàn ờ gal cau geh sền gròi ngan. Ồng Y Cing Mlô, Phó Củ tịc UɃÑZ thị xã Buôn Hồ pà git: thị xã pơn jăt tai hòi jà ală bơta pràn bơh dà lơgar tus mờ càr nàng tơrgùm bơcri priă bơtàu tơnguh lơh sa – mpồl bơtiàn ai ală ƀòn tàm tiah làng bol jơi bơtiàn ờ gal cau in. Ồng Y Cing Mlô pà git: “Tàm tơngai tus UɃÑZ thị xã tơrgùm lơh ờ uă kơnòl broă tờm, ală broă dong kờl bơh Đảng, adăt boh lam bơh Dà lơgar gơrềng tus broă kòn cau mờ broă kòn cau tàm tơngai tŭ do, bơcri priă bơ̆t bơtàu phan bơna, lơh sa mpồl bơtiàn nàng tơnguh uă priă geh tàm rài kis làng bol in. Tơrgùm bơtàu tơnguh lơh sa mpồl bơtiàn, bơto sồr làng bol in git ngui ală bơta chài măi mok pa nàng lơh gơguh uă cồng nha, bơta niam phan geh lơh. Tơnguh broă gàr kơl jăp bơta lơngăp lơngai cíñ trị, lơngăp lơngai mpồl bơtiàn”.

Geh càr Kon Tum rơwah lơh lài, kơnhoàl tiah nhàr dà lơgar Sa Thầy neh bơyai lơh geh cồng nha Pơrjum dờng cau ala măt ală jơi bơtiàn ờ gal cau dơ̆ IV nam 2024. Kơnhoàl tiah nhàr dà lơgar Sa Thầy, càr Kon Tum geh khà kờp làng bol rơlao 54 rơbô nă, tàm hơ̆ làng bol jơi bơtiàn ờ gal cau geh rơlao 57%, kơnhoàl geh 11 xã, thị trấn mờ 64 thôn, ƀòn, tàm hơ̆ geh 45 thôn làng bol jơi bơtiàn ờ gal cau. Lơh jăt broă lơh mờ Lơh ngan jăt pang sră Pơrjum dờng cau ala măt ală jơi bơtiàn làng bol ờ gal cau dơ̆ III neh ai, 05 nam do ală làng bol jơi bơtiàn ờ gal cau kis tàm kơnhoàl neh tam klăc bal, lơh ngan pơgồp bal tàm broă lơh pràn lơh sa – mpồl bơtiàn bơtàu tơnguh.

Tus tŭ do, jơh ală gùng lòt bơh tiah tàm gùl kơnhoàl tus ală xã mờ 64 thôn, ƀòn neh geh lơh kơl jăp, gàr niam broă lòt rê 2 kàl mìu mờ prang; jơh ală hìu làng bol tàm kơnhoàl neh geh ngui ồs đèng dà lơgar; jơh ală xã, thị trấn geh hìu sơnơm tơl pràn; kơnhoàl geh 05 xã geh khà ƀòn lơgar pa mờ 01 xã geh khà xã ƀòn lơgar pa tơnguh uă; 07 thôn, ƀòn geh dờp thôn, ƀòn lơgar pa tàm tiah làng bol jơi bơtiàn ờ gal cau. Ală măt jơi bơtiàn ờ gal bơnus Rơ Măm tus bal pơrjum dờng, bi A Thái, Ƀí thư Ci ƀộ, Kwang atbồ ƀòn Le, xã Mô Rai pà git: “Tus pơrjum dờng cau ala măt ală jơi bơtiàn ờ gal cau kơnhoàl Sa Thầy dơ̆ iV nam 2024 añ pơnyờ să ngan. Mờ gơnoar broă là Ƀí thư Ci ƀộ, kwang atbồ ƀòn añ sùm lam lài tàm broă lam sồr làng bol bơtàu tơnguh lơh sa, lơh sa nàng gơguh rài kis. Tàm hơ̆ uă ngan là lơh jăt Jơnau đơs pơn dŭt sồ 08 bơh Tỉñ ủy dê bè lơh tam gơl bồ tơngoh kơlôi sơnơng, broă lơh gơwèt mờ làng bol jơi bơtiàn ờ gal cau mờ sơrbì ală bơhiàn ờ niam. Tus pơrjum añ geh bơsram uă broă lơh mờng chài, broă lơh bơh ală ƀòn, ală thôn, ală xã ndai dê nàng rê lam sồr làng bol mờ ngui tàm rài kis”.

Tàm Pơrjum dờng cau ala măt ală jơi bơtiàn ờ gal cau kơnhoàl Sa Thầy dơ̆ IV, ală cau ala măt geh sền wơl cồng nha lơh jăt broă kòn cau mờ Lơh ngan jăt pang sră Pơrjum dờng dơ̆ III neh geh ai; pờ tê ring bal Jơnau lơh ngan jăt pang sră Pơrjum dờng dơ̆ IV mờ jơnau kờñ pơn jăt tai bơ̆t bơtàu mpồl tam klăc bal ală kòn cau; tơnguh uă bơta ngăc ngar cau lơh broă làng bol jơi bơtiàn ờ gal cau; hòi jà, lơh mờ ngui geh cồng nha ală bơta pràn, bơta geh mờ bơta kwơ kơnhoàl dê; prăp gàr mờ ngui niam bơta kwơ niam chài ờs mờng ală jơi bơtiàn làng bol ờ gal cau dê… Pơrjum dờng pồ geh 22 nă cau ala măt tus Pơrjum dờng cau ala măt làng bol ală jơi bơtiàn ờ gal cau càr Kon Tum dơ̆ IV nam 2024.