Jăt Tổng kông ty Điện lựk tiah tàm gùl lơgar (EVNCPC) yal, nam 2024 kờp dŭ bơta pràn ồs đèng uă ngan geh 4 rơbô 194 MW, gơguh rơlao 10% pơn drờm mờ nam lài. Tàm tơngai trồ prang duh bè tŭ do, khà ồs đèng geh ngui tus 87 tơlăk 600 rơbô kWh tàm 1 ngai. Tềng đăp mờ bơta do, EVNCPC neh đơng lam ală mpồl lơh broă bal tơrgùm jơh bơta pràn, lơh pràn ală broă nàng tơnguh broă ai ồs đèng kơl jăp cau ngui in.

Jăt mờ hơ̆, lơh jơh bơta pràn 1 rơbô 095 MW bơh ală hìu măi ồs đèng dà, ai tai ồs đèng măt tơngai hờ đang rơkàng hìu tàm pơgăp 1 rơbô 970 MW, mờ khà ồs đèng dờp bơh gùng che ồs đèng dà lơgar. Gah lơh ồs đèng ală càr, ƀòn dờng tiah tàm gùl lơgar mờ Tây Nguyên lơh mhar ală rơndăp broă bơcri priă lơh di jăt mờ broă rơndăp lơh neh geh ai, tơmù bơta uă ir tàm ală gùng che ồs đèng, măi biến áp gam lơh broă. Tàm tơngai trồ prang duh bè tŭ do, ală mpồl lơh broă ờ gơtùi ơm, tơmù ai ồs đèng; mìng geh ơm tŭ gơtìp bơta ờ niam. Mờ tơnguh mpồl lơh broă sền grài nàng gàr niam bơta bơsong tŭ geh bơta ờ niam tàm 2 jơ, mhar ai ồs đèng drơng làng bol in.