Jăt mờ hơ̆, bơh ngai 11 nhai 10, giă tăc ồs đèng ndrờm bal là 2 rơbô 103 đong tàm 1 kWh ồs đèng (ờ hềt kờp dia gơguh priă), gơguh 4,8% pơn drờm là giă lài mờ hơ̆. Bè bơta tờm, broă lơh wơl giă ồs đèng dơ̆ do rơ̆p gàr niam ală hìu rơƀah, ală hìu nhă geh sră dong kờl gơtìp gơrềng tàm khà ờ uă ngan. Jăt jơnau kờp, gùt lơgar geh 815 rơbô hìu rơƀah mờ ală hìu geh sră dong kờl bơh mpồl bơtiàn geh dong kờl priă ồs đèng jăt gùng dà broă lơh bơh Cíñ phủ dê. Tàm hơ̆, hìu rơƀah geh dong kờl mờ khà priă ndrờm bal mờ khà ồs đèng geh ngui 30kWh ồs đèng tàm 1 hìu 1 nhai. Hìu geh sră dong kờl bơh mpồl bơtiàn geh khà ồs đèng ngui ờ uă ir 50kWh ồs đèng tàm 1 nhai geh dong kờl ndrờm mờ khà ồs đèng geh ngui 30kWh ồs đèng. Do là dơ̆ tơnguh giă ồs đèng dơ̆ 3 bơh nhai 5 nam 2023, nàng lơh wơl giă tăc ồs đèng jăt jơnau pal jăt tàm drà kă bro dê, di pal mờ priă tă lơh sa kă bro.