Lơh jăt ală jơnau pal jăt tàm adăt bè ù tiah, càr Dăk Lăk sền wơl geh rơlao 188 rơbô lồ ù bơh ală mpồl lơh sa suơn sre gơwèt kấp kơnhoàl atbồ. Bŭ lah bè hơ̆, tus nhai 07 nam 2024, càr Dăk Lăk mìng rơ̆p kĭ ai ngui geh 02 gùng dà broă ngui ù geh bơh mpồl lơh sa suơn sre brê bơnơm dê geh Anih duh broă Làng bol ală kơnhoàl, ƀòn drà dờng, ƀòn dờng lơh, 20 gùng dà broă lơh gam tai gam tàm tơngai lơh wơl, bơtơl tai nàng lơh gơs, ờ hềt geh kĭ.

Ồng Nguyễn Thiên Văn, Phó Củ tịc Anih duh broă Làng bol càr Dăk Lăk pà git, broă lơyài kĭ ală gùng dà ngui ù gơwèt mờ bă ù geh bơh mpồl lơh sa suơn sre brê bơnơm lơh gơrềng uă ngan tus mờ broă hòi jà bơcri priă, rài kis broă lơh broă sa mpồl bơtiàn, bơtàu tơnguh lơh sa tàm càr dê. Den tàng, nàng Adăt Ù tiah nam 2024 geh ngui tàm mùl màl, bơsong geh cồng nha ală bơta gơrềng bal tus rơlao 500 rơbô lồ ù geh bơh mpồl lơh sa suơn sre brê bơnơm dê, pal geh broă pơgồp bal nền nòn đah ală sở, gah lơh broă bal mờ gơnoar atbồ kấp kơnhoàl dê.