Đơs tàm pơrjum, Củ tịc Quốk hội ồng Trần Thanh Mẫn jờng rơ, dờp, đơs niam broă lơh ngan bal mờ ală cồng nha neh lơh geh bơh Mpồl Làng bol lơh broă sa Việt Nam dê, bơh tơl nă kwang bàng, cau tàm mpồl cau lơh broă sa, Mpồl lơh broă bal broă lơh sa suơn sre gùt lơgar dê, tàm hơ̆ uă ngan là tàm 63 nă cau, 63 mpồl lơh broă bal pơnrơ geh jờng rơ tàm dơ̆ pơrjum.

Gơwèt mờ ală cau, mpồl lơh broă pơnrơ geh jờng rơ, Củ tịc Quốk hội sồr, pal pơn jăt tai lam lài tàm broă lơh broă bal, pơgồp bal lơh sa kă bro; pơn jăt tai lơh broă jơh pràn, ai bơta ngăc ngar, bơto bơtê broă lơh mờng chài, dong kờl uă cau ndai in, nàng geh tai uă làng bol lơh broă sa brồ guh lơh pas di pal, uă Mpồl lơh broă bal broă lơh sa suơn sre geh cồng nha, nàng bal mờ mpồl bơtiàn lơh jăt jơnau kờñ tơmù rơƀah kơl jăp, bơ̆t bơtàu ƀòn lơgar pa.