Càr Dăk Nông gơmù khà hìu bơnhă rƀah mhar ngan rlau jơh tàm tiah Tây Nguyên. Do là jơnau yal geh sền gròi uă ngan tàm Pơrjum dờng Cau ala mat ală jơi bơtiàn dồ ết nă cau tàm càr Dăk Nông dơ̆ 4, nam 2024 sơnđờm mut lơh tàm drim ngai 15 nhai 10, mờ bơta tus bal bơh 250 nă cau ala mat, ala mat ai rlau 227 rơbô nă cau jơi bơtiàn dồ ết nă cau jơh gùt càr dê.

Tơngai bơh nam 2019 - 2024, bal mờ ală broă lơh, broă dong kờl bơh Dà lơgar dê, càr Dăk Nông neh tàm bơrlŭ bal ală priă jền, lam lơh uă broă lơh, rơndăp broă lơh bơcri priă bơt bơtàu phan bơna kwơ màng, lơh li la uă drơng broă làng bol, bơtàu tơnguh broă lơh tơrmù rƀah, bơsong bơta ờ tơl ù ơm, hìu ơm, ù lơh sa. Bơh hơ̆, khà hìu bơnhă rƀah tàm tiah jơi bơtiàn dồ ết nă cau càr Dăk Nông dê gơmù bơh 30,14% nam 2019 gơmù gam 13,24% tàm lồi nam 2023. Jat ồng Ngô Thanh Danh, Ƀí thư Tỉñ ủy càr Dăk Nông, broă lơh jơi bơtiàn mờ broă lơh jat ală broă dong kờl jơi bơtiàn tàm tiah do dê neh lơh geh ală cồng nha chờ hờp ngan. Tàm tơngai lơh broă tus, càr Dăk Nông lơh ngan gơmù khà hìu bơnhă rƀah gơmù hơđơm 10%; 70% khà xã tiah làng bol jơi bơtiàn dồ ết nă cau mờ tiah kơh bơnơm lơh sir broă lơh ƀòn lơgar pa.