Tơngai lơh broă pa do, Anih duh broă Mặt trận Dà lơgar Việt Nam ală kấp neh bơyai lơh jăk broă jăt sền mờ tă pơgồp jơnau đơs mpồl bơtiàn. Uă tơngu me jăt sền bơh Mặt trận Dà lơgar Việt Nam neh lơh geh cồng nha niam, dong kờl anih lơh broă geh gơnoar di tŭ bơsong kal ke, gơkòl; ai geh jơnau đơs lơh gơs gùng dà broă lơh; di pal mờ jơnau kơ̆p kờñ, sền gàr gơnoar, bơta kwơ di adăt boh lam, di pal bơh làng bol dê.

Xã Minh Khai, kơnhoàl Hoài Đức, ƀòn dờng Hà Nội… Kờp jơh bă ù geh toh wơl nàng lơh gùng Jăt gah 4-Tiah Càr lơgar là 5 lồ 7 sào bơh 143 hìu. Do là xã sơnrờp ngan tàm kơnhoàl Hoài Đức lơh gơs tàm broă lam sồr làng bol ai ù tiah nàng lơh gùng Jăt gah 4 in. Tus tŭ do neh geh 100% nă làng bol neh dờp priă tơm bơtơl dong kờl, jào ù ai broă lơh gùng in mờ sền ală gơl gùng sơnrờp ngan bơh Rơndăp broă lơh gùng neh sơn đờm tuh bê tông cài. Mò Đỗ Thị Tuyết, Kwang atbồ Mpồl Lơh broă Mặt trận thôn Minh Hoà 3, xã Minh Khai pà git: “Kwang atbồ thôn mờ Mpồl lơh broă Mặt trận pal tus bal lơh broă den hơ̆ sồng geh bè do. Mpồl lơh broă Mặt trận thôn tus lam sồr làng bol kung kơlôi rơcang sơl, ờ git tam gơl broă den di gơlan gơtìp kal ke lah ờ? Mơya nàng lơh jăt jơnau kờñ dà lơgar den ală hìu pal lơh jăt bal”.

Lơh jăt gùng dà broă lơh “làng bol git, làng bol cri bơyai, làng bol lơh, làng bol sền swì, làng bol jăt sền, làng bol dờp bơta kwơ”, tàm tơngai lơh broă pa do, Anih duh broă Mặt trận Dà lơgar Việt Nam neh đơng lam lơh geh 31 mpồl jăt sền nàng bơyai lơh jăt sền jăt tơngu me; Anih duh broă Mặt trận Dà lơgar Việt Nam ală kấp tàm ƀòn lơgar neh đơng lam, pơgồp bal jăt sền geh 231 rơbô dơ̆. Lơh broă tă pơgồp jơnau đơs mpồl bơtiàn pơgồp bal tàm broă ngui gơnoar lơh tờm bơh làng bol dê tàm broă tus bal bơtàu tơnguh lơh sa mpồl bơtiàn. Mơya, tàm mùl màl uă tiah geh ală jơnau làng bol gŏ, làng bol git, mơya ờ gŏ bài kờñ đơs, ờ khin đơs, ờ khin tă pơgồp jơnau đơs. PGS.TS ồng Vũ Văn Phúc, Phó Củ tịc Mpồl duh broă Khoa họk ală anih lơh broă Đảng Dà lơgar sồr: “Tàm mùl màl đơs sùm: làng bol tus bal lơh, lơh niam đảng, làng bol pơgồp jơnau đơs tàm broă jăt sền kwang bàng đảng viên, mơya ờ hềt geh dùl gùng dà broă lơh lơi geh cồng nha nàng mùl màl ngui gơnoar jăt sền bơh Mặt trận Dà lơgar, ală mpồl lơh broă cíñ trị mpồl bơtiàn mờ làng bol. Den tàng, pal ngui rơlao tai gơnoar bơh làng bol tàm broă sền wơl, jăt sền mpồl kwang bàng đảng viên lơh jăt gơnoar, kơnòl broă bơh să tờm dê; kwang bàng đảng viên lơh jăt broă lam lài; jăt sền kwang bàng đảng viên bơsram tàp bè nùs nhơm niam, rài kis niam”.

Nàng broă jăt sền, mblàng lơh loh bơh Mặt trận Dà lơgar ờ gam là broă lơh gời den pal geh ai gùng dà broă lơh làng làng bol geh ai jơnau tơngit tơl, di mờ di tŭ. Jăt sền, mblàng lơh loh bơh làng bol pal lơh jăt loh làng, ndrờm bal, ngui uă ngan, tơl ngan broă tus bal bơh làng bol dê, tàm hơ̆ uă ngan là gơnoar bơh làng bol dê tàm broă jăt sền kwang bàng, đảng viên tàm anih lơh broă mờ ƀòn ơm kis. Pal nền nòn iăt, đơs wơl, bơsong wơl jơnau jăt sền, mblàng lơh loh mpồl bơtiàn bơh Mặt trận Dà lơgar Việt Nam dê. Mò Nguyễn Quỳnh Liên, Kwang atbồ Mpồl Lơh tờm, jăt sền mờ tă pơgồp jơnau đơs mpồl bơtiàn  gơwèt Anih duh broă Mặt trận Dà lơgar Việt Nam pà git: “Bol añ rơ̆p kơlôi sơnơng nàng ai geh dùl gùng dà broă lơh gàr niam broă lơh jăt ală jơnau đơs bơh Mặt trận dê tơnơ̆ tŭ jăt sền, tă pơgồp jơnau đơs. Bơh gùng dà broă lơh do den rơ̆p ai geh ală gùng dà broă lơh glài mờ gờñ lơh mùl màl jăt jơnau lơh nền tàm Bơta 14 bơh Jơnau lơh njền sồ 69 dê, kung bè ală broă lơh geh ai tàm Jơnau sồr sồ 22 bơh Ƀan Ƀí thư dê, nàng gàr niam ală anih lơh broă pal geh kơnòl tàm broă lơh jăt ală jơnau đơs bơh Mặt trận dê”.

Broă jăt sền, tă pơgồp jơnau đơs mpồl bơtiàn  bơh Mặt trận Dà lơgar dê pal geh ai bơh làng bol, ngui uă ngan broă tus bal, pơgồp bal bơh làng bol. Pal geh gùng dà broă lơh nàng làng bol lơh jăt gơnoar jăt sền, tă pơgồp jơnau đơs mpồl bơtiàn dê. Ngui gơnoar jăt sền bơh làng bol là lơh jăt nùs nhơm bơh Củ tịc Hồ Chí Minh dê “ai làng bol lơh tờm”, nàng bơyai lơh, lam làng bol tus bal jăt sền mpồl lơh broă đảng, đảng viên pơgồp bal tàm broă ai broă jăt sền geh lơh nền nòn mờ mùl màl – geh cồng nha.