Đảng ƀộ kơnhoàl tiah nhàr lơgar Sa Thầy, càr Kon Tum geh 53 mpồl đảng kâp hơđơm gơ wèt bal, bal mờ 2 rbô 100 nă đảng viên. Tơnơ̆ tŭ geh Tỉñ ủy càr Kon Tum rwah bơyai lơh pơrjum dờng lơh tơrlòng lài Đảng ƀộ kâp kơnhoàl, ngai 04 nhai 07 nam 2024 Mpồl Duh broă Đảng ƀộ kơnhoàl Sa Thầy neh ai lơh jăt Broă rơndăp lơh sồ 208 bè rơcăng mờ bơyai lơh pơrjum dờng đảng ală kâp tơngai lơh broă bơh nam 2025- 2030. Mò Y Sâm, Phó Ƀí thư Duh broă sùm Huyện ủy kơnhoàl Sa Thầy pà gĭt, kơnhoàl neh bơyai lơh mblàng yal broă lơh rơcăng pơrjum dờng ai jơh ală kwang bàng tờm in, mơkung lơh Mpồl dềt Kwang bàng, Mpồl dềt Sră nggal mờ Mpồl dềt Rơndăp broă drơng broă pơrjum dờng. Mò Y Sâm, đơs: Nàng rơcăng niam pơrjum dờng in, Mpồl Lơh kơnòl broă sùm Huyện ủy sồr ală anih lơh broă mpồl lơh broă is ồn là Mpồl dềt broă Kwang bàng rơcăng niam broă lơh kwang bàng di bơta rơndăp tăp sèng, jơnau ai, jăt pơlam gùng Jơnau sồr 35 mờ ală sră nggal bơto pơlam bơh Mpồl rơndăp broă Dà lơgar dê bè broă lơh kwang bàng. Gơ wèt mờ sră nggal tŭ do neh sồr Anih duh broă Làng bol kơnhoàl mờ ală gah kờp sền nền wơl ală broă jàu Jơnau lơh nền tàm pơrjum bơh Pơrjum dờng Đảng ƀộ tơngai lơh broă bơh nam 2020- 2025 mờ ală kơnòl broă cíñ trị bơh tiah do dê.

Bal mờ broă lơh rơcăng pơrjum dờng lơh tơrlòng lài Đảng ƀộ kơnhoàl, Huyện ủy kơnhoàl Sa Thầy sồr ală mpồl đảng kâp hơđơm gơ wèt bal lơh broă rơndăp lơh pơrjum dờng bơh ci ƀộ, đảng ƀộ dê jăt di jơnau sồr, tơnggume cih tàm Jơnau sồr sồ 35 bơh Ƀộ Cíñ trị dê.

Jăt mờ hơ̆, ală ci ƀộ gơ wèt Đảng ủy kâp hơđơm rơ̆p lơh sir pơrjum dờng lài mờ ngai 30/11/2024. Đảng ƀộ xã Ya Xiêr geh Huyện ủy kơnhoàl Sa Thầy rwah bơyai lơh pơrjum dờng lơh tơrlòng lài kâp hơđơm digơlan bơyai lơh pơrjum dờng tàm ngai 06/01/2025. Ồng Phan Chí Thiện, Ƀí thư Đảng ủy xã Ya Xiêr, pà gĭt, tŭ do jơh ală 13 ci ƀộ tàm xã gam jal mhar lơh sir broă lơh rơcăng pơrjum dờng in. Ồng Phan Chí Thiện, đơs: Jơh ală ci ƀộ neh geh bơto yal gờñ ngan bè gùng dà bơyai lơh pơrjum dờng lơh tơrlòng lài xã dê. Ală ci ƀộ neh rơcăng lài cih sră nggal tus tơngai tŭ do den jơh ală ci ƀộ gam lơh cih sră nggal, gam ai jơnau đơs bơh ală anih lơh broă geh gơrềng dê nàng geh dồ jơnau yal cíñ trị, jơnau yal sền wơl tìs di sir niam mờ dipal mờ bơta geh ngan. Bồ nhai 10 jơh ală ci ƀộ rơ̆p pơyua broă rơndăp lơh kwang bàng tus Mpồl Duh broă Đảng ủy xã in sền swì mờ ai jơnau đơs.

Bal mờ crăp rơcăng niam ai pơrjum dờng tơngai lơh broă pa in, ală mpồl đảng kâp hơđơm tàm kơnhoàl Sa Thầy, càr Kon Tum kung gam lơh pràn ală srơh tàm pơrlòng lơh geh cồng nha chờ gờm pơrjum dờng đảng ƀộ ală kâp. Kờp sền wơl nền nòn, jal mhar pơnđơl pràn lơh geh cồng nha ală broă jàu mờ tơngai lơh broă pơrjum dờng lài neh sồr lơh. Mờ bơh jơnau sồr ngan ngồn kung gĭt nền ală jơnau kờñ mùl màl ai tơngai lơh broă pa in. Bi A Tớ, Ƀí thư Ci ƀộ mơkung là Kwang ătbồ thôn Plei O, xã Ya Xiêr, kơnhoàl Sa Thầy, pà gĭt: Tơnơ̆ tŭ tơn jơh tơngai lơh broă bơh nam 2022- 2025, jăt jơnau sồr lơh bơh Đảng ủy xã Ya Xiêr dê, pơn jăt tai broă lơh rơcăng ai pơrjum dờng tơngai lơh broă pa bơh nam 2025- 2027 in, bal mờ hơ̆ ală kwang bàng đảng viên kung jơh nùs hòi jà làng bol lơh tam gơl pa wơl sươn rơhàng nàng lơh jăt broă lơh jơnau kờñ dà lơgar bơtàu tơngguh lơh sa. Nàng rơcăng ai pơrjum dờng tơngai lơh broă bơh nam 2025- 2027 in, Ci ƀộ kung neh pơrjum nàng lơh broă lơh kwang bàng, jơnau yal sền tìs di, tus tŭ do sền bal neh lơh sir, jăt bơta rơcăng den tàm ngai 16 nhai 10 nam 2024 Ci ƀộ Plei O rơ̆p bơyai lơh pơrjum dờng.

Tus tŭ do, kơnhoàl Sa Thầy, càr Kon Tum neh lơh geh 54 tàm 71 broă jàu mờ Jơnau lơh nền tàm pơrjum bơh Pơrjum dờng Đảng ƀộ kơnhoàl dơ̆ XVII, tơngai lơh broă bơh nam 2020- 2025 dê jàu. Pơnrơ ngan là broă bơ̆t bơtàu Đảng, kờp bal pah nam kơnhoàl tơmŭt đảng geh 100 nă đảng viên pa, sơrlèt rlau 10% broă jàu. Jơh ală 64 thôn, ƀòn geh Ƀí thư Ci ƀộ mơkung là Kwang ătbồ thôn halà Kwang ătbồ Mpồl lơh broă mặt trận, sơrlèt 30% pơndrờm mờ Jơnau lơh nền tàm pơrjum.

Tŭ do, Mpồl Lơh kơnòl broă sùm Huyện ủy kơnhoàl Sa Thầy gam pơn jăt tai sồr 53 mpồl đảng kâp hơđơm pal lơh jăt niam ală broă, di bơta rơndăp tăp sèng mờ lơh sir broă bơyai lơh pơrjum dờng lài mờ ngai 10/02/2025. Bal mờ hơ̆, sồr bal ală anih lơh broă cíñ trị lơh ngan lơh sir ală jơnau kờñ tơngai lơh broă lài neh jàu nàng lơh jơnau bơh sơnrờp ai tơngai lơh broă pa in bal mờ bơta jơh nùs pơn jăt tai tơngguh uă pràn jak đơng lam, pràn tam lơh, bơ̆t bơtàu Đảng ƀộ mờ ală anih lơh broă cíñ trị kơnhoàl dê ngai sơlơ sàng goh, pràn kơnhăp; sền gròi ai rài kis làng bol in ngai sơlơ hờm ram, chờ hờp chờ hờn.