Tổng Ƀí thư, Củ tịc lơgar ồng Tô Lâm tus mờ geh jơnau đơng lam tàm Pơrjum dờng. Tus bal Pơrjum dờng geh 1 rơbô 52 nă cau ala măt ală làng bol, ală mpồl lơh broă, jơi bơtiàn, jăt yàng, mpồl ling, cau lơgar Việt Nam kis hờ lơgar bơdìh mờ kwang bàng Mặt trận ală kấp, ai tơngŏ rùp rài geh pơnrơ ngan bơh mpồl tam klăc gùt jơi bơtiàn.

Mờ jơnau kờñ pơn jăt tai ngui bơhiàn ờs mờng, bơta pràn tam klăc gùt jơi bơtiàn, tơngai lơh broă bơh nam 2024 tus 2029, Pơrjum dờng ai geh 6 broă lơh, tàm hơ̆ geh: Lơh pràn broă mblàng yal, lam sồr, tơrgùm ală làng bol, tơnguh broă ring bal tàm mpồl bơtiàn, ngui bơta pràn tam klăc bal gùt jơi bơtiàn. Tơnguh uă bơta niam, cồng nha broă jăt sền mờ tă pơgồp jơnau đơs mpồl bơtiàn, lơh jăt làng bol lơh tờm, tus bal bơ̆t bơtàu Đảng, Dà lơgar. Lam sồr ală làng bol tus bal pơrlòng, bơceh lơh, lơh geh cồng nha ală dơ̆ lam sồr, broă pơrlòng. Ngui gơnoar lơh tờm, nùs nhơm atbồ is bơh làng bol, bơ̆t bơtàu ƀòn ơm kis tam klăc bal, hờm ram, gơboh gơbài. Tơnguh uă cồng nha broă lơh bal mờ lơgar ndai làng bol dê mờ broă cau lơgar Việt Nam kis tàm lơgar bơdìh. Pơn jăt tai tam gơl pa broă kwang bàng, tơngu me, gùng dà broă lơh; tơnguh uă bơta pràn mpồl kwang bàng Mặt trận ală kấp.