Bàr kwang đơng lam bồ tơlik nùs nhơm tàm tơngai tus lơh ngan pơn jăt tai ai bơta git gơ̆p Tam klăc bal Jŏ mờng tơl ală bơta đah lơgar Việt Nam mờ lơgar Hàn Quốk bơtàu tơnguh pràn kơl dang, jrô ơnàng rơlao tai. Bàr gah ring bal tơnguh ală broă tàm pơgơl bal, tìp bal kấp dờng; lơh pràn broă lơh bal sền gàr dà lơgar, lơngăp lơngai; lơh pràn broă lơh bal lơh sa, kă bro phan, bơsong ală bơta gơkòl, ai geh bơta niam nàng phan kă bro tus tàm drà kă bro bal, kung bè lơh broă bal tàm ală gah broă pa, geh uă bơta pràn bè khoa họk kông nghệ, tam gơl pa bơceh lơh, kơlôi sơnơng là bơtàu tơnguh.

Thủ tướng Cíñ phủ ồng Phạm Minh Chính đơs nền lơgar Việt Nam rơ̆p pơn jăt tai ai tơl bơta ƀuơn nàng ală cau bơcri priă lơgar Hàn Quốk lơh sa jŏ jòng tàm lơgar Việt Nam; sồr lơgar Hàn Quốk pơn jăt tai pờ mpồng drà kă bro ai phan kă bro lơgar Việt Nam in, tàm hơ̆ uă ngan là phan geh lơh bơh suơn sre, blơi tơmŭt tàm drà kă bro lơgar Hàn Quốk; ai geh ală khà priă càn sa priă cồng ờ uă ai lơgar Việt Nam in nàng lơh jăt ală rơndăp broă lơh phan bơna dờng, geh rùp rài bè gùng rơndeh ồs, gùng rơndeh ntoăt mhar.