Tơngai pa do, Kwang atbồ anih lơh broă ala mat lơgar Việt Nam sùm sền gròi mpồl bơtiàn cau Việt Nam, dong làng bol kis tàm lơgar ndai iang nùs lơh broă sa, ơm kis, pơgồp bơnah bơtàu tơnguh lơh sa- mpồl bơtiàn bơh lơgar Lào dê mờ tă pơgồp ai ƀòn lơgar, dà lơgar, ai bơta gĭt gơ̆p Việt Nam mờ Lào in.

Đơs tàm dơ̆ tìp, Thủ tướng ồng Phạm Minh Chính jờng rơ ală anih lơh broă ala mat tàm lơgar Lào neh sơr lèt gan uă kal ke, lơh sir niam ngan ală kơnòl broă mờ Đảng mờ Dà lơgar dê jàu, pơgồp bơnah sơlơ tơnguh tai bơta gĭt gơ̆p lơh bơyô bal dờng màng, tam klăc bal is ồn mờ lơh broă bal tơl làm Việt Nam mờ Lào. Thủ tướng đơs loh, tàm bơta gĭt gơ̆p đah Việt Nam mờ Lào, bơta gĭt gơ̆p cíñ trị là tờm ngan, mơkung pal sơlơ tơnguh tai pràn kơl dang lơh broă bal lơh sa, lơh broă bal bơto bơtê mờ bơsram mpồl cau mờ ală gah broă ndai, pơgồp bơnah bơt bơtàu, bơtàu tơnguh ai bơta gĭt gơ̆p đah Việt Nam mờ Lào dê ngai sơlơ bơtàu tơnguh tàm tơl gah broă, cèng wơl bơta kwơ ngan ngồn ai làng bol 2 lơgar in.