Mho mang ngai 11/10, rơndeh par is pơndiang Thủ tướng Cíñ phủ ồng Phạm Minh Chính bal mờ mpồl cau ala măt kwang bàng kâp dờng lơgar Việt Nam tus bal Pơrjum Kwang bàng kâp dờng Asean dơ̆ 44, 45 mờ ală Pơrjum Kwang bàng kâp dờng geh gơrềng bal tàm Vientiane, lơgar Lào, bơh ngai 08 tus ngai 11/10/2024 neh rê hờ lơgar, tơn jơh dơ̆ lòt lơh geh cồng nha niam bơnĕ. Tàm 04 ngai Pơrjum geh mờr 20 broă lơh, rlau 30 nă Kwang đơng lam bồ ală lơgar Asean mờ cau lơh broă bal tus bal, pơgăp 90 sră nggal geh ring bal mờ cih dờp. Mờ broă rơndăp lơh broă rơ̆ ru ngan, lơh sùm tàm 04 ngai, Thủ tướng Cíñ phủ mờ ală kwang bàng tàm mpồl neh tus bal rlau 60 broă lơh jơh bal 2 gah mờ uă gah, đơs nền rùp rài rơcăng lài, jơh nùs mờ geh kơnòl bơh Việt Nam dê, mơkung pơgồp bơnah bơtàu tơngguh gĭt gơ̆p bơh lơgar Việt Nam dê mờ ală lơgar lơh broă bal. Pơrjum Kwang bàng Kâp dờng Asean dơ̆ 44, 45 mờ ală Pơrjum geh gơrềng bal neh lơh geh cồng nha niam bơnĕ, tơn jơh wơl nam Củ tịc Asean 2024 bơh lơgar Lào dê.

Thủ tướng ồng Phạm Minh Chính neh geh ală dơ̆ tìp bal mờ Thủ tướng lơgar Lào mờ Thủ tướng lơgar Campuchia, bal mờ gơ̆p đơs sùm bơhiàn ờs mờng bơh yau mờ bơta kwơ bơh bơta tam klăc bal Việt Nam- Lào mờ Campuchia; dồ nùs bal pơn jăt tai pơgồp bal ai gĭt gơ̆p lơh broă bal pe lơgar ngai sơlơ ngan ngồn mờ geh cồng nha, lơh geh jơnau kờñ geh ngan bơh pe lơgar dê mờ dipal mờ jơnau kờñ bơtàu tơngguh tàm tŭ tơngai pa.