Đơs tàm dơ̆ lơh broă, Tổng Ƀí thư, Củ tịc lơgar ồng Tô Lâm đơs niam Đảng ƀộ, gơnoar atbồ càr Quảng Trị neh tam klăc bal, ring bal, tus bal lơh jăt Jơnau lơh nền Pơrjum dờng dơ̆ XIII bơh Đảng, mờ Jơnau lơh nền pơrjum dờng Đảng ƀộ càr dơ̆ XVII, neh ai geh uă jơnau lơh nền mìng dùl tơngu me, jơnau đơs pơn dŭt, jơnau sồr, ală broă lơh, broă rơndăp lơh jăt…

Càr Quảng Trị geh khà gơguh lơh sa mhar rơlao khà gơguh bè ờs bơh gùt lơgar dê; bơta pràn tàm pơrlòng bơh gah lơh sa geh gơguh; bơta hòi jà bơcri priă, tă dia mờ ai broă lơh ngai sơlơ gơguh, phan bơna ngai sơlơ geh bơcri priă ndrờm bal mờ lơh gơs, tàm hơ̆ uă ngan là phan bơna gùng lòt geh tơrbŏ bal. Bơta niam chài, bơto bơtê, lơh sơnơm geh càr sền gròi mờ tơrgùm uă priă bơcri, broă lơh broă sa mpồl bơtiàn, drơng gàr cau rơƀah, cau ờ pràn tàm mpồl bơtiàn geh sền kwơ; lơh jăk broă jơi bơtiàn, jăt yàng, tam klăc jơi bơtiàn.