Đơs tàm dơ̆ tìp măt, Tổng Ƀí thư, Củ tịc lơgar ồng Tô Lâm cih dờp mờ jờng rơ ală cồng nha lơh geh, cồng nha kwơmàng bơh mpồl ală cau lơh sa kă bro dê gơ wèt mờ bơta bơtàu tơngguh dà lơgar dê. Mơkung cih dờp mờ jờng rơ Ală mpồl Kă bro phan mờ Lơh sa mờ măy mŏk lơgar Việt Nam dê bal mờ ală mpồl cau lơh sa kă bro, mpồl lơh sa kă bro neh geh uă tă pơgồp bơ̆t bơtàu mpồl bơtiàn mpồl lơh sa kă bro pràn kơldang kơ̆ kơl jăp. Bulah bè hơ̆, Tổng Ƀí thư, Củ tịc lơgar kung sơđio ală bơta ờ hềt dipal bơh mpồl ală cau lơh sa kă bro lơgar he dê kung gam dềt, bơta pràn priă jền ờ geh uă, bơta pràn jak ătbồ ờ hềt pràn ngan, ờ hềt geh cau lơh sa kă bro lơh geh gơnoar broă tàm pơrlòng tàm kơnhoàl ù tiah do mờ tàm gùt plai ù.

Jăt Tổng Ƀí thư, Củ tịc lơgar đơs, mpồl lơh sa kă bro pas sơm den dà lơgar rơ̆p pas sơm. Tài bè hơ̆, broă tơrgùm tă bơsong kal ke ai mpồl lơh sa kă bro in, dong kờl mpồl lơh sa kă bro bơtàu tơngguh là kơnòl broă tờm kwơmàng khà dùl bơh jơh ală kâp, ală gah dê. Tổng Ƀí thư, Củ tịc lơgar nting bơr kơ̆p kờñ cau lơh sa kă bro lơgar he dê ngai sơlơ bơtàu tơngguh pràn kơldang mờ kơ̆ kơl jăp, sơrlèt bơta lòng, dờp rò tŭ niam, lơh geh uă cồng nha kă bro, tă pơgồp tàm bơta bơtàu tơngguh lơh sa dà lơgar mờ bơta pas sơm bơh mpồl bơtiàn dê.