Tàm gùl kàl prang Tây Nguyên, sàh Rờ Kơi, kơnhoàl Sa Thầy, càr Kon Tum kung gam tơlir niam ngan sơl bơh rlau 4 rbô 200 lồ chi jŏ nam mờ chi sa plai dê. Tàm bă ù tiah nhàr lơgar do neh geh hìu măy lơh bơsơ̆t kau su, anih lơh sa sươn dờng ròng phan mờ măy mŏk pa, anih tam chi ngui măy mok pa…Ồng A Êl, kra ƀòn Gia Xiêng, pà gĭt, tiah nhàr lơgar Rờ Kơi tŭ do ờ gam là tiah ngài, tiah kal ke tai: “Pơndrờm mờ lài do den uă tam gơl, bơh kòn bơnus, soh phan, boh bơr tus broă bơtàu tơnguh bè lơh sa. Tơngai rềp ndo bơtàu tơngguh pràn ngan. Tŭ do den làng bol tơrmù tờm bùm blàng mờ tơngguh tờm kơphê, kau su. Làng bol lơh jăt bè jơnau sồr, gùng dà broă lơh Đảng dê, kơrnoăt boh lam Dà lơgar dê”.

Càr Kon Tum geh 13 sàh tiah nhàr lơgar rềp 2 lơgar bơyô Lào, Campuchia. Tàm ală nam nhai tam lơh dră wơl bol sò tơm Mỹ thàm phà, do là tiah tờm tam lơh lơh aniai cui rơcai ngan bơh Mỹ Ngụy dê nàng kờñ kơryan cơnđoà guh bơh cau ling he dê tàm gơl gùng Trường Sơn ndu gơnrơh. 50 nam tơnơ̆ tơngklàs, bal mờ gùng Hồ Chí Minh, gùng rơndeh dà lơgar 14C geh bơcri priă neh lơh geh bơta tàm tơrbŏ tàm jơh gùt gơl gùng tiah nhàr lơgar jòng rlau 292 kơi sồ.

Bơh bă ù gơtìp lơh lề trak tài bơh ƀồm mền gar năt, sơnơm khih lơh aniai tàm rài tam lơh, Kon Tum neh brồ guh pràn kơldang. Nam lài, kờp jơh phan bơna lơh geh tàm ù tiah càr dê geh mờr 50 rbô tơmàn đong; priă lơh geh kờp bal dùl nă cau rlau 68 tơlak đong; khà gơguh 8,02%, ơm dơ̆ 24 gùt lơgar mờ jơnhoa ngan rlau jơh kơnhoàl ù tiah Tây Nguyên. Ồng Nguyễn Tấn Liêm, Kwang Lam bồ Sờh Broă lơh sa sươn sre mờ Tiah ơm kis càr Kon Tum pà gĭt, gah broă lơh sa sươn sre geh ală tă pơgồp kwơmàng gơ wèt mờ gơguh lơh sa càr dê: “Tàm 4 nam rềp ndo, mùl màl là nam 2021, gah broă lơh sa sươn sre bol hi dê gơguh là 5,75% ơm dơ̆ 5 tàm 63 càr, ƀòn dờng. Nam 2022, gơguh 6,19% ơm dơ̆ dùl. Nam 2023 gơguh 6,76% ơm dơ̆ 5 mờ nam 2024 gơguh 5,97% ơm dơ̆ 2. Tàm 4 nam rềp ndo gơguh bơh gah broă lơh sa sươn sre dê ơm tàm mpồl 5 gùt lơgar”.

Pin dờn brồ guh pràn kơldang, càr Kon Tum tŭ do neh lơh gơs geh 2 tiah lơh sa gơn kơnờm geh ƀòn dờng Kon Tum mờ kơnhoàl Kon Plông. Ngui niam bơta pràn geh lài, càr lơh gơs geh tiah tam tờm chi lơh sơnơm tơrgùm bal mìng tàm 3 kơnhoàl: Tu Mơ Rông, Đăk Glei, Kon Plông mờ kờp jơh bă ù rlau 13 rbô lồ, tàm hơ̆ geh rlau 2 rbô 900 lồ kơnuh sơnơm Ngọc Linh. Tiah lòt nhơl ƀòn brê bơnơm dà lơgar Măng Đen tàm kơnhoàl Kon Plông gơgơs anih tus gơhòi gơ jà năc lòt nhơl tàm dơlam mờ bơdìh lơgar…

Tềng đăp jơnau sồr kah yau tàm Rài brồ să jơi bơtiàn dê, lơh jăt jơnau sồr bơh Dà lơgar dê, càr Kon Tum neh lơh jăt rơndăp tăp sèng tơrmù dipal, rơndăp mpồl lơh broă jăt gùng dà “Di- Tơl- Pràn- Lơh broă jak- Lơh gơtùi- Geh cồng nha”. Ồng Dương Văn Trang, Kwang bàng Đảng Dà lơgar, Ƀí thư Tỉñ ủy càr, Củ tịc Anih duh broă Làng bol càr Kon Tum, pà gĭt, jơh ală anih lơh broă cíñ trị càr dê gam jơh nùs lơh ngan lơh gơs jơnau kờñ gơguh 10% nam 2025, jơnhoa ngan rlau jơh kơnhoàl ù tiah Tây Nguyên: “Tơngai tus rơ̆p gam uă kơnòl broă jal mhar kwơmàng gơ sồr jơh ală anih lơh broă cíñ trị pal lơh broă jơh nùs jơh tồr, kràñ cê jơh nùs bal mờ nùs nhơm sơrbăc mhar, niam mờ kơnòl uă ngan rlau jơh. Tơl nă oh mi tàm kâp ủy, mpồl đơng lam anih lơh broă mpồl lơh broă pơn jăt tai lơh jăt niam niam gơnoar broă lơh lài, lơh krơh, tam klăc, tơrgùm bal pràn, dồ nùs bal sơrlèt jơh ală kal ke, bơta lòng lơh sir jak ngan kơnòl broă geh jàu dipal mờ bơta pin dờn Đảng ƀộ mờ Làng bol càr dê”. 

Nggùl rài tơnơ̆ ngai tơngklàs, bơh bă ù kong uă jê sồt muăt jrùm tàm rài tam lơh, Kon Tum gam brồ să gơgơs dùl anih pơnrơ ngan bơtàu tơngguh Tây Nguyên dê. Mŭt tàm tŭ tơngai pa, mờ jơh nùs lơh ngan pràn kơldang, Kon Tum gam pah ngai đơs nền anih ơm, wèt tus jơnau kờñ gơguh mhar, kơ̆ kơl jăp, dipal mờ măt sơnđan là bă ù khin cha jak chài.