Broă lơh bơh Tỉñ đoàn càr, Mpồl Tam klăc Ơruh pơnu Việt Nam càr Gia Lai dê pơgồp bal mờ Mpồl Tam klăc Ơruh pơnu Việt Nam quận 12, ƀòn dờng Hồ Chí Minh dê bơyai lơh. Tàm Hìu bơsram kấp 1 Võ Văn Kiệt, sàh Ia Dơk, kơnhoàl Đức Cơ, nùs nhơm hô hơng mờ Ngai chờ kơnòm dềt lời ai ală kơnòm dềt in. Mpồl bơyai lơh neh jàu pà uă phan pà geh ngan bè: broă lơh niam wơl hìu ơm tàm klăc dờng ai hìu bơnhă kal ke in, jàu 1 rơbô pang sră cih ai Huyện đoàñ Đức Cơ in nàng lơh jat broă lơh “Tài mpồl kơnòm dềt kờñ gơboh”; 5 bơnah priă bơsram ai kơnòm bơsram sơr lèt gan kal ke bơsram jak mờ 20 bơnah phan pà ai kơnòm bơsram geh rài kis kal ke in.

Tàm sàh tiah nhàr lơgar Ia Dom, broă lơh neh cèng tus uă broă lơh geh ngan; jàu pà 400 nơm bồng bi Dà lơgar, 30 thùng dà toh ai kơnòm dềt in, 50 bơnah phan pà ai hìu bơnhă kal ke mờ lam lơh broă lơh bơt bơtàu “sòl àng gùng tiah nhàr lơgar”. Mờ 200 nă làng bol kung geh kham sơm kòp ờ sa priă sơl.