Tàm nùs nhơm ngoh rơngăc kah wơl bè ală ngai sơnrờp tơnklàs càr Dăk Lăk, ồng Y Per Niê, kis tàm sơnah ƀòn Đạt Hiếu, ƀòn drà dờng Buôn Hồ (neh geh tŭ lơh broă tàm dòr kơphe Rossi rài lài dê) pà git: tơnơ̆ ngai tơnklàs, dòr kơphe Rossi gơwèt broă ngui bơh cau dùl nă să rài lài do dê neh geh Dà lơgar tam gơl gơs bă ù dà lơgar dê.

Ală kấp, gơnoar atbồ pa mŭt lơh wơl lơh broă, bơ̆t bơtàu wơl ƀòn lơgar. “Tơnklàs neh jơh dòr ù do geh dà lơgar ngui jơh, lơh gơs suơn dờng, lơh ngan tàm broă lơh sa, hòi jà làng bol tus bal lơh bơtơ̆t rơbòng dà, tềng bơtơ̆t ƀòn Trinh bơh dòr Rossi tus đah ne nàng tuh dà kơphe in, tuh dà tus tàm bă sre, làng bol chờ hờp ngan den tàng làng bol tus bal lơh. Làng bol tờ rơbòng mờ bơta pràn bơh tŭ pa tơnklàs. Đơs ngan là cau lơh broă bal mờ làng bol cau lơi kung chờ hờp tài bơh tŭ do neh lik klàs mờ bơta rồn bơklơn”.

Tơnơ̆ 50 nam tam lơh pha lin Buôn Ma Thuột mờ tơnklàs càr Dăk Lăk, nùs nhơm làng bol pơnyờ să mờ ngoh rơngăc ngan. Ală nam, nhai gơtìp glar bòl, kòl jan kal ke neh gơs ală ngai chờ hờp, pờ geh dùl rài bơtàu tơnguh lơh sa mpồl bơtiàn àng gơcrà ngan. Tàm hơ̆ uă ngan là tờm kơphe dê, rùp rài bơh tiah Tây Nguyên dê – neh pơgồp bal kwơ màng tàm broă lơh geh priă, tơnguh uă bơta kwơ bơh phan geh lơh bơh broă lơh sa suơn sre dê mờ ai tơngŏ bơngă bơh kơphe lơgar Việt Nam dê tàm drà kă bro ală lơgar. Ồng Ama H’ Loan, kis tàm sơnah ƀòn Thắng Lợi, ƀòn dờng Buôn Ma Thuột tơlik nùs nhơm pơnyờ să bè do: “Kwơ màng tàm nam do là Tơnkah 50 nam tam lơh pha lin Buôn Ma Thuột, mờ kung là Lơh chờ kơphe geh bơyai lơh dờng ngan bơh lài tus tŭ do. Gơnoar broă bơh añ mờ ală cau chài tàm ƀòn dê là ală cau yal bè bơta niam chài kòn cau Rơđê. Hơ̆ là ală phan ồi yau, ală bơta phan uh, phan teh ờs mờng bè: Kipah, Kơmboăt, Đờng T’rưng… Kwơ màng nam do tơnkah 50 nam tơnklàs càr Dăk Lăk, añ gŏ rài kis làng bol neh tam gơl, bơtàu tơnguh ngan. Làng bol geh tam gơl bồ tơngoh, bơtàu tơnguh lơh sa; ai bơh nam lài tus tŭ do, kơphe gơguh priă tăc uă ngan. Hơ̆ là bơta chờ dờng ngan ai cau tam kơphe in”.

Lơh chờ kơphe Buôn Ma Thuột dơ̆ 9 nam 2025, geh uă broă lơh nàng jờng rơ cau tam, lơh mờ kă bro kơphe; yal bơta geh lòt nhơl, hòi jà bơcri priă tàm gah kơphe mờ ală phan geh lơh bơh broă lơh sa suơn sre dê; yal bơta niam chài ờs mờng krơi is bơh làng bol ală jơi bơtiàn dê, tàm hơ̆ uă ngan là Tiah niam chài Cing mồng Tây Nguyên – Bơta niam lời wơl mờ bơr đơs bal mờ Phan lời wơl niam chài ờ di phan bơna kòn bơnus dê. Mò H’ Bích Byă kis tàm ƀòn M’Brê, sàh Hoà Phú, ƀòn dờng Buôn Ma Thuột ngoh rơngăc đơs: “Lơh chờ do là lơh chờ dờng ngan tus mờ gùt làng bol tàm càr he dê. Ală cau tam kơphe kung chờ hờp ngan tăc gơguh priă, geh tơl priă nàng bơcri tàm broă lơh sa. Añ pơnyờ să ngan tài do kung là dơ̆ niam nàng kơphe he geh tăc tus tàm dunia. Sền wơl 50 nam do, rài kis làng bol neh bơtàu tơnguh ngan, tàm hơ̆ uă ngan là tàm bàr nam pa do, kơphe tăc gơguh priă, làng bol he geh priă tơm jơh dồs den tàng chờ hờp ngan”.

Mờ jơnau yal “Buôn Ma Thuột – Tiah tus bơh kơphe dunia dê”, Lơh chờ Kơphe Buôn Ma Thuột dơ̆ 9 jờng rơ ală cau geh pơnrơ jăk gah niam chài, lòt nhơl, wă nền nòn bè kơphe mờ bơta niam chài Tây Nguyên dê. Bi Y Miu Niê, kis tàm sàh Ea Drông, ƀòn drà dờng Buôn Hồ là dùl tàm ală cau Ală măt yal tơngit tàm dơ̆ lơh Chờ kơphe pà git, di tàm dơ̆ do gam lơh ngan nàng mblàng yal jơnau “Buôn Ma Thuột - tiah tus bơh kơphe dunia dê”. “Añ gŏ Lơh chờ Kơphe geh kwơ màng ngan, chờ hờp ngan, làng bol lơh broă sa kung chờ hờp ngan sơl chờ gờm lơh chờ do. Bơh tŭ hơ̆, ai geh bơta pràn làng bol lơh broă sa in iang nùs lơh sa. Kơ̆p kờñ là bơh lơh chờ, rơ̆p dong kờl ai priă tăc phan geh lơh gơguh uă rơlao tai, làng bol lơh broă sa rơ̆p geh rài kis hờm ram, pas gơs rơlao. Añ là mìng dùl nă klao pơnu gam kơnòm, mơya bơh jơnau yal rài lài do bal mờ rài kis mùl màl tŭ do dê, tơnơ̆ 50 nam tơnklàs, rài kis bơh làng bol mùl màl neh tam gơl uă ngan, niam bơnĕ rơlao, gơguh jăk rơlao mờ bơtàu tơnguh rơlao”.

“Buôn Ma Thuột – Pràn kơl dang mờ àng gơcrà” là ală bơta lơi he gơtùi gŏ geh tàm ală ngai nhai pe rài kah yau dê. Nggùl rài neh rơlao bơh tŭ tam lơh pha lin tàm ngai 10 nhai 3 nam 1975, Buôn Ma Thuột kung gam kơ̆ kơl jăp pràn kơl dang cau Tây Nguyên dê. Ngai do, tàm bă ù geh uă bơta niam chài krơi is do, Lơh chờ Kơphe Buôn Ma Thuột geh tai bơta àng gơcrà, cèng bal nùs nhơm pơnyờ să bè gar kơphe Tây Nguyên – “bơta niam brê bơnơm dờng” lik tus gùt dunia.