Drim òr (26/02), tàm ƀòn dờng Buôn Ma Thuột, Mpồl bơyai lơh Lơh chờ Kơphe Buôn Ma Thuột dơ̆ 9 nam 2025, pơn jăt tai pơrjum ƀăo bè broă lơh do. Do là dơ̆ pơrjum dơ̆ 3 tơnơ̆ mờ 2 dơ̆ pơrjum geh bơyai lơh tàm ƀòn dờng Hồ Chí Minh mờ Hà Nội.

Nam do, lơh chờ rơ̆p geh 17 broă lơh mùl màl. bơdìh mờ ală broă lơh ndrờm bal mờ ală dơ̆ lơh chờ lài do, lơh chờ dơ̆ do geh uă bơta krơi is mờ ală rơndăp broă lơh geh sơn đờm mŭt lơh nàng chờ gờm 50 nam tơnklàs Buôn Ma Thuột, bè Mŭt lơh hìu măi kơphe năng lượng Trung Nguyên Legend; Mŭt lơh Mpồl Anih kă bro phan - Hìu năc ơm - Hìu ơm tàm ƀòn dờng Buôn Ma Thuột; dơ̆ sơn đờm mŭt lơh Bơcri priă lơh Tiah Lơh sa mờ măi mok Phú Xuân. Lơh chờ kơphe Buôn Ma Thuột dơ̆ 9 nam 2025, mờ jơnau geh ai “Buôn Ma Thuột - Tiah tus bơh kơphe dunia dê” rơ̆p geh bơyai lơh bơh ngai 9 tus ngai 13 nhai 3 nam 2025. Ồng Nguyễn Tuấn Hà, Phó Củ tịc Duh broă sùm Anih duh broă Làng bol càr Dăk Lăk mờ kung là Lam bồ mpồl bơyai lơh Lơh chờ do pà git, do kung rơ̆p là broă lơh hòi jà kă bro phan geh kwơ màng ngan; là dơ̆ niam nàng ală cau atbồ, mpồl lơh sa kă bro mờ ală lơgar tìp bal, lơh broă mờ kă bro bal, mờ yal khà măt kă bro kơphe Buôn Ma Thuột, bơtàu tơnguh lòt nhơl mờ tơrbŏ bal gùng kă bro phan.