Mò Võ Thị Bạch Nga, cau tờm dùl anih tac phan tàm sơnah ƀòn Tân Lập, càr Dăk Lăk yal, pah tŭ tus sa tềp bơhiàn dà lơgar pah nam, hìu tac phan mò dê ndrờm rơcang lài uă ngan ală bơta phan pal geh drơng sa tềp bè ƀañ kàu, ơlak ƀièr, dà hùc lơh jơh tơhìr, phe, tơngi, dà màn, ƀòk ngòk,.. Nàng geh priă blơi phan nàng tac, mò pal càn bơh broă lơh gàr kơ̆ giă priă bơh dà lơgar lam lơh, mờ bơnah priă càn mờr 2 tơmàn: “Priă càn mờ añ kờñ pơgap 2 tơmàn đong, añ ngui nàng blơi phan tac lài mờ sa tềp nàng geh khà phan tac sùm. Añ kơp kờñ priă cồng ai càn gàr sùm rlau 6% bè pah nam, mờ geh dong kờl gàr kơ̆ sùm bè do den rơp geh cồng ai hìu tac phan in mờ jơh bal cau blơi in. Tŭ geh priă càn gàr kơ̆ giă, priă cồng ai càn dồ êt den ngan là hìu tac phan ờ duh pal tơnguh giă jơnhua ir, mờ bè hơ̆ den cau blơi phan kung geh dờp kuơ uă rlau”.

Ồng Bùi Quang Hòa, Kwang lam bồ Siêu thị Co.opmart Buôn Ma Thuột pà git, sa tềp nam ơseh 2026 do, khà blơi ală bơta phan pal geh gơ wèt 5 mpồl phan tờm geh biap kơnuh plai chi, phan sa, phe, sơdàng mờ phe geh đơs lài gơguh mờr 6% tàm siêu thị. Nàng gàr tơl mpồl tac phan, siêu thị neh rơcang lài lơh broă mờ ală mpồl tac phan, sồr rơcang phan wil tơl, gàr kloh niam ờdo ờdă phan sa, tơngai ngui phan loh làng, mờ kung ờ tơnguh giă phan tìs mờ jơnau sồr: “Lơh broă mờ Sờh Lơh sa mờ măi mok mờ kă bro phan càr Dăk Lăk, bol hi hơ pơrgon ai tơlik giă kơ̆ kơljap mờ lir loh làng tàm siêu thị, tơngai 3 nhai bơh ngai 15/12/2025 tus ngai 15/3/2026. Nàng lơh jat jơnau hơ pơrgon do, bol hi lơh broă mờ ală mpồl tac phan mờ khi kung neh ring bal kĭ jơnau hơ pơrgon, tàm tơngai lài mờ tŭ, tàm tŭ mờ tơnơ̆ sa tềp tac phan ờ tơnguh giă”.

Lam lơh broă lơh gàr kơ̆ giă tàm tơngai lài mờ tŭ, tàm tŭ mờ tơnơ̆ sa tềp nam ơseh 2026 jat jơnau sồr lơh bơh Cíñ phủ dê, tàm càr Dăk Lăk geh 16 anih priă jền tus bal broă lơh ai càn priă. Ồng Trần Minh Hoàng, Phó Kwang lam bồ sơnĕ Anih priă jền kă bro phan pơgồp bal bơcri priă mờ bơtàu tơnguh càr Dăk Lăk pà git, tus bal broă lơh, anih priă jền neh mờ gam lam lơh uă bơnah ai càn priă geh dong kờl priă cồng nàng kờñ dong ală mpồl bal, cau nă să is kă bro ală bơta phan ngui sa pal geh drơng dà sa tềp in. Broă lơh ai càn geh lam lơh ngac ngar jat jơnau kờñ, ai tơlik khà tă ai càn dipal, sră nggal càn priă ƀuơn, sơrbac mhar, priă cồng ai càn lơyah mờ kơ̆ kơnhăp, bơh hơ̆ lơh gơlik bơta ƀuơn nàng mpồl lơh sa kă bro, hìu bơnhă kă bro mờ cau tac phan in ƀuơn geh càn, ngui priă càn dồ bă geh cồng nha tàm dơ̆ do: “Jat jơnau lơh nền bơh Anih priă jền kă bro phan pơgồp bal bơcri priă mờ bơtàu tơnguh Việt Nam, bol hi sùm ai lài priă càn tus gah lơh gơlik phan, kă bro, ngan là lơh gơlik, tac bro phan ngui sa. Gơ wèt mờ gah do, Anih priă jền ờ tơlik khà mùl màl bơnah priă càn, priă cồng ai càn sùm geh ngui tàm khà lơyah ngan rlau jơh tàm ală broă lơh ai càn. Tŭ ală mpồl bal, hìu bơnhă kă bro mờ cau tac phan kờñ den bol hi rơcang lam lơh ală bơnah priă càn ờ tơlik khà mùl màl nàng dong kờl cau càn in”.

Khà tơrgùm kờp bơh Sờh Lơh sa mờ măi mok mờ kă bro phan càr Dăk Lăk, jơnau kờñ blơi phan ngui sa kờp bal pah nhai tàm càr geh mờr 3 rbô 400 tơmàn đông. 1 nhai lài mờ sa tềp bơhiàn dà lơgar nam ơseh 2026, khà blơi phan kờp dŭ gơguh mờr 30%, ndrờm mờ rlau 1 rbô tơmàn đong, tơrgùm tàm ală bơta phan ngui sa pal geh bè: biap kơnuh plai chi, phan sa, phe, sơdàng, boh, àu mpha, khŏ zep, ơlak ƀièr, dà hùc lơh jơh tơhìr.

Ồng Nguyễn Hải Triều, Phó Kwang lam bồ Sờh Lơh sa mờ măi mok mờ kă bro phan càr Dăk Lăk pà git, nàng gàr tơl phan tac, giă tac dipal tàm dơ̆ sa tềp, Sờh neh sồr mpồl atbồ drà kă bro mờ ală cơldŭ, mpồl mờng chài sơlơ lòt sền ală mpồl tac phan mờ kung tă pơgồp jơnau đơs mờ Anih duh broă Làng bol càr sồr ală anih priă jền kă bro phan rơndap ai priă càn dong kờl priă cồng, sa priă cồng dồ êt nàng drơng broă gàr kơ̆ giă: “Tàm broă lơh gàr tơl phan bơna tac mờ gàr kơ̆ giă tàm càr, Anih duh broă Làng bol càr Dăk Lăk neh geh sră nggal sồr 13 mpồl lơh sa kă bro geh ală siêu thị, anih tờm kă bro phan, tac phan rah rài bè Co.opmart, GO!, Bách hóa xanh, Vinmart,… bal mờ bàr pe mpồl lơh sa kă bro tac phan ngui sa pal geh tus bal broă lơh do. Bơdìh hơ̆ tai, Sờh kung neh ai gơnoar uă mpồl bơyai lơh drà tàm tiah Buôn Ma Thuột mờ tiah rềp bal nàng làng bol in blơi phan sa tềp”.

Khà blơi phan gơguh uă tàm dơ̆ sa tềp, mơya mờ bơta rơcang lài bơh phan tac, priă càn tus broă lơh atbồ drà kă bro, broă lơh blơi phan sa tềp tàm càr Dăk Lăk sền bal rơp geh gàr kơ̆. Phan bơna li la, giă tac geh gròi sền dong làng bol iang nùs blơi phan. Dùl dơ̆ sa tềp wil tơl, ƀuơn ƀuài gam tus rềp mờ làng bol càr Dăk Lăk.