Hìu neh geh tŭ là cồng nha prăp pềr sùm tàm uă nam lơh broă bơh ùr bơklao mò Lê Thị Minh Trang, tàm thôn Vĩnh Xuân, sàh Tuy An Tây dê, tŭ do mìng gam gơlời gơnru tơrlah tơnơ̆ mờ tŭ dòr bơnơm đah tơnơ̆ hìu ni sơna tơrlah. Mho ngai 19 nhai 11 lài do, hìu gơtìp rơdàng uă, gơnoar atbồ sàh di tŭ sồr ntrờn. Mơya mìng tơnơ̆ mờ dùl mang mìu sơr, hìu neh gơtìp tơrlah jơh. “Hìu nhă bal mờ làng bol tàm ƀòn do kơ̆p kờñ dà lơgar lơh geh hìu ơm ai làng bol in, di lah ờ den ơm kis tàm bơta bè do kung glar bòl ngan”.

Rài kis hìu nhă mò Trang kung là bơta mùl màl bal bơh 35 hìu làng bol pal ntrờn tàm thôn Vĩnh Xuân dê. Jăt ồng Lê Minh Ý, Ƀí thư Ci ƀộ mờ kung là Kwang atbồ thôn Vĩnh Xuân pà git, lài mờ tŭ gơtìp rềs àr gơlik geh, làng bol mìng kis mờ broă lơh sa suơn sre, tam prìt, tam tào. Tơnơ̆ mờ mìu càl dờng sồ 13, phan tam ờ hềt thàn kis wơl den dơ̆ dà tih dà cò pơn jăt tai neh lơh tơrlah ù uă, lơh uă hìu làng bol gơtìp tàm bơta roh hìu, roh ù lơh sa. Tŭ do, jơnau kơ̆p kờñ mùl màl ngan bơh làng bol dê là gờñ geh hìu ơm. “Pa do Anih duh broă Làng bol sàh kung neh lùp làng bol, làng bol ring bal bè broă do uă ngan, làng bol kung kơ̆p kờñ tus tàm ƀòn ơm kis pa lơngăp lơngai rơlao. Kơ̆p kờñ lơh gờñ nàng làng bol geh hìu ơm lơngăp lơngai, gờñ kơl jăp rài kis”.

Ồng Phan Quang Phi, Củ tịc Anih duh broă Làng bol sàh Tuy An Tây pà git, gơnoar atbồ sàh neh sền wơl, tơrgùm kờp 49 hìu tàm tiah gơtìp tơrlah ù, ai lài tềng đăp măt lơh hìu ơm kis pa ai 35 hìu di gơlan gơtìp uă in. Tiah lơh ƀòn ơm kis pa geh rơwah gơwèt sàh Tuy An Nam, ngài mờ ƀòn ơm kis lài do di pơgăp 5 kơi sồ: “Sàh mhar pơgồp bal mờ sàh Tuy An Nam kung bè Mpồl atbồ tŭ lơi lơh gơs sră nggal lơh ƀòn ơm kis pa den rơ̆p bơyai lơh ală hìu do in. Gàr niam di tơngai jăt jơnau sồr bơh Thủ tướng Cíñ phủ dê”.

Bơta pal kah ngan tàm broă lơh ƀòn ơm kis pa là nùs nhơm ring bal uă ngan bơh làng bol tàm tiah geh dờp dê. Tàm thôn Quảng Đức, sàh Tuy An Nam, do là tiah geh rơwah nàng lơh ƀòn ơm kis pa, neh geh 17 hìu làng bol jào is ù, lơh geh bă ù kloh niam nàng lơh hìu ơm ai ală hìu gơtìp tơrlah ù in. Mò Nguyễn Thị Chín, Kwang atbồ thôn Quảng Đức, sàh Tuy An Nam pà git: “Thôn kung lam làng bol tàm do ring bal ai ù nàng ală hìu gơtìp tơrlah ù in ntrờn tus tàm do nàng ơm kis bal chờ hờp, làng bol tàm do kung ring bal uă. Làng bol tàm do kung ai tơl bơta niam nàng ală hìu gơtìp kal ke rơlao in, bè nha ngan glòm nha sèt hơ̆”.

Nùs nhơm tam pà bal hơ̆ geh ai tơngŏ loh làng bơh mò Trương Thị Nhung tàm thôn Quảng Đức, sàh Tuy An Nam dê, tŭ ù mờr 2 sào hìu nhă mò dê geh tàm bă ù gơtìp toh nàng lơh ƀòn ơm kis pa. “Añ ring bal, sền do bè he dong kờl ală hìu gơtìp tơrlah ù tàm đah ne in, mìng kờñ tơm ntrờn tơl làng bol in là di pal”.

Nàng lơh mhar broă lơh hìu, kwang đơng lam bồ càr Dăk Lăk bal mờ ală sờh, gah lơh broă gơrềng bal mờ kwang đơng lam bàr sàh Tuy An Tây mờ Tuy An Nam neh lòt sền bă ù geh rơwah nàng lơh ƀòn ơm kis ai 35 hìu làng bol in. Bă ù do ơnàng di pơgăp 3 lồ, geh 52 bă ù bơh 20 hìu làng bol dê. Tàm dơ̆ lơh broă mờ làng bol, ồng Nguyễn Thiên Văn, Phó Củ tịc Anih duh broă Làng bol càr Dăk Lăk sồr ală sờh, gah lơh broă pơgồp bal nền nòn, lơh geh mpồl dong kờl is ồn nàng bơsong jơh sră nggal jăt mờ gùng dà broă lơh jal mhar, tơrmù uă ngan tơngai rơcang bơcri priă in, gàr tơl niam jăt adăt boh lam dê nàng gờñ lơh hìu ơm ai làng bol in. “He ngui gùng dà broă lơh geh nùs nhơm krơi is, gam tàm broă lơh hìu den pal lơh jăt jơnau sồr tàm bơta jal mhar nàng lơh. Mơya lơh pal tềm pềr ngan, cồng nha geh uă ngan, mùl màl ngan, bañ lời gơtìp hoàc huơr, ờ niam gơlik geh”.

Broă lơh ƀòn ơm kis pa ai 35 hìu làng bol tàm tiah tơrlah ù tàm sàh Tuy An Tây ờ mìng là gùng dà broă lơh tềng đăp măt nàng gàr niam màng kis làng bol in, mờ gam ai tơngŏ loh làng kơnòl broă bơh gơnoar atbồ ală kấp dê, bal mờ nùs nhơm tam klăc bal, tam pà bal tàm mpồl bơtiàn dê tai.