Drim ngai 18/12, Phó Thủ tướng Cíñ phủ ồng Hồ Quốc Dũng bal mờ mpồl lơh broă neh tus còp, pà phan mờ gờm chờ kah ngai Yàng lik lềng tàm Tòa Tổng Giám mục Hìu Yàng bàp Huế, mơkung còp, gờm chờ làng bol jat Yàng bàp tàm ù tiah ƀòn dờng Huế dê. Ala mat đơng lam bồ Đảng mờ Dà lơgar, Phó Thủ tướng neh pà guàng bơkào, pơyoa jơnau gờm chờ tus Đức Tổng Giám mục ồng Đặng Đức Ngân, ală cau duh broă Yàng mờ jơh gùt làng bol jat Yàng bàp tàm Hìu Yàng bàp Huế dê wă rò dùl kàl Noel nam 2025 lơngai lơngò, ram mhŭ, nam pa 2026 lơngăp lơngai, gơboh gơbài, pơn jat tai lơh jat niam bơhiàn kờñ gơboh Dà lơgar, kis “Niam rài kis, duh rơngòt Yàng”. Phó Thủ tướng đơs sùm gơnoar broă jơh nùs bơh làng bol jat Yàng bàp dê tàm mpồl tam klăc dờng jơh gùt jơi bơtiàn, tă pơgồp tàm bơta bơtàu tơnguh lơh sa – mpồl bơtiàn bơh Dà lơgar dê.

Dùl ngai bal, Phó Thủ tướng neh còp mờ pà phan ai 2 hìu bơnhă làng bol jat Yàng bàp geh rài kis kal ke tàm sơnah ƀòn Thuận Hóa mờ lòt sền broă lơh lơh hìu, lơh niam wơl hìu ơm tàm tiah gơtìp hoàc huơr tài bơh trồ tiah lơh aniai, broă lam lơh “ broă lơh Quang Trung” dong kờl làng bol bè ờs rài kis tàm sàh Lộc An, ƀòn dờng Huế.