Tàm 9 nhai nam 2026 dê, broă lơh sa tàm ală sàh, sơnah ƀòn jăt gah dà lềng càr Dăk Lăk dê pơn jăt tai geh kơl jăp sùm; kă bro phan, broă lơh drơng ala, lòt nhơl mờ lơh phan, ròng phan tàm dà geh tam gơl pràn. Geh 09 tàm 15 sàh, sơnah ƀòn lơh gơs, sơrlèt mờ kờp dŭ lài tă tàm kes priă nam 2026. Geh tus 06 sàh, sơnah ƀòn lơyài broă ai priă bơcri dà lơgar dê. Tàm hơ̆ geh sàh Tuy An Đông ai priă 0%, sàh Xuân Cảnh mờr 30%, sàh Xuân Lộc rơlao 56,5% mờ sơnah ƀòn Sông Cầu mờr 57%.

Mơya, lơh sa suơn sre, lơh sa mờ măi mok, lơh hìu ơm, atbồ ù tiah, bơ̆t bơtàu, bơcri priă kung gam uă kal ke. Broă rơndăp tăp sèng, bơsong phan bơna dà lơgar tàm ờ uă sàh, sơnah ƀòn gam gơlik bơta gơkòl. Broă ờ tơl kwang bàng lơh broă tờm, phan bơna măi mok yal tơngit ờ hềt ndrờm bal, gam lơh gơrềng tus mờ bơta niam, tơngai bơsong broă lơh, tàm hơ̆ uă ngan là tàm ală gah broă ù tiah, rơndăp ù tiah, bơ̆t bơtàu, priă jền, bơcri priă mờ măi mok yal tơngit.

Tàm 03 nhai lồi nam 2026, khà kơnòl broă gam wơl uă, tàm hơ̆ uă ngan là broă ai ală khà priă, lơh gơs broă lơh, rơndăp broă lơh. Tàm tŭ quý IV kung là tŭ gơtìp trồ tiah mìu càl dờng, di gơlan lơh gơrềng tus mờ tơngai lơh, den tàng di lah ờ geh broă lơh lài di pal den rơ̆p kal ke ngan kờñ geh ală khà broă gơguh lơh sa.

Tàm pơrjum, ală sàh, sơnah ƀòn pà git neh ai kơnòl broă, gùng dà broă lơh jăt tơl nhai tàm quý IV mờ gam pơn jăt tai sền wơl, lơh gơs jơnau neh geh ai gơguh lơh sa. Ồng Đỗ Hữu Huy, Chủ tịch Anih duh broă Làng bol càr Dăk Lăk pà git, pal sền gròi ngan tus mờ ală sàh, sơnah ƀòn gam geh khà bơta kwơ lơh sa dờng pal geh lơh mờ pal geh gùng dà broă lơh mùl màl, nền nòn nàng geh ală khà broă gơguh lơh sa. Ồng pà git tai rơ̆p ai khà KPI gơwèt mờ kwang bàng lam bồ, tàm hơ̆ uă ngan là Bí thư Đảng ủy mờ Chủ tịch Anih duh broă Làng bol tàm kấp sàh: “Nàng lơh gơs 10 khà broă gơguh lơh sa tàm quý 4, tơl sàh, sơnah ƀòn pal sền wơl jơh tơl khà broă mờ jào broă tus tơl kwang bàng, cih loh tơngai lơh gơs tơl broă. Sờh Dơlam is ai khà 10 khà broă do mờ ờ uă khà broă ndai tai nàng tơrgùm bal, yal Chủ tịch Anih duh broă Làng bol càr in kĭ ai ngui broă lơh lài KPI quý IV tàm ală oh mi lơh Chủ tịch Anih duh broă Làng bol tàm ală sàh, sơnah ƀòn”.

Tềng đăp mờ bơta trồ tiah mìu càl dờng tàm ală nhai lồi nam 2026, ală sàh, sơnah ƀòn tiah jăt gah dà lềng càr Dăk Lăk neh ai tơl mpồl lơh broă tàm tiah do tơn mờ sền wơl tiah di gơlan gơrềng uă nàng geh gùng dà broă ntrờn làng bol bơh gờñ. Ală sàh, sơnah ƀòn kung ai geh gùng dà broă lơh nàng gàr niam tiah ròng phan tàm dà tàm dà lềng mờ jăt gah dà lềng; gàr niam lơngăp lơngai ai ơhò, plung in.

Kwang đơng lam Anih duh broă Làng bol càr Dăk Lăk sồr ală sàh, sơnah ƀòn lơh mơ gùng dà broă lơh nền nòn, yal loh jơnau tơngit bơh tơl hìu di gơlan pal ntrờn tài rềs àr bơh trồ tiah, phan ntrờm mờ anih dờp ntrờn, lơh ngan bañ lời gơtìp ờ thàn, ni sơna.