Ngai 26/12, Tỉñ ủy càr Gia Lai bơyai lơh Pơrjum tơn jơh 07 nam lơh jăt Jơnau lơh nền tàm pơrjum sồ 18 bơh Mpồl Duh broă Đảng Dà lơgar khoă XII dê bè rơndăp tăp sèng rơndăp mpồl lơh broă ală anih lơh broă cíñ trị tơrmù, lơh broă gơtùi, cồng nha. Jăt broă rơndăp lơh tơnơ̆ do, Gia Lai pơn jăt tai tơrmù mpồl lơh broă sră pơ àr gơnoar ătbồ, digơlan gơmù 7 sở, 31 cơldŭ mpồl.

Càr Gia Lai digơlan tơmŭt bal ală sở, mpồl, gah geh: Mpồl Mblàng yal mờ Bơto bơtê mờ Mpồl Hòi jà làng bol Tỉñ ủy càr; Sở Broă rơndăp lơh mờ Bơcri priă bal mờ Sở Priă jền; Sở Broă lơh sa sươn sre mờ Bơtàu tơngguh Ƀòn lơgar mờ Sở Phan geh is mờ Tiah ơm kis; Sở Bơ̆t bơtàu mờ Sở Gùng lòt Jun pơndiang; Sở Jak chài mờ Măy mŏk mờ Sở Yal tơnggĭt mờ Mblàng yal jơnau; Sở Broă dơlam is mờ Sở Lơh broă- Cau ling sồt să mờ Mpồl bơtiàn. Bal mờ hơ̆, Sở Lơh sơnơm rơ̆p dờp lơh tai kơnòl broă sền gàr pràn kơldang să jan kwang bàng in bơh Mpồl Sền gàr mờ trăng sền pràn kơldang să jan kwang bàng càr in. Sở Bơto bơtê mờ Bơsram dờp lơh tai gơnoar broă ătbồ bơto bơtê broă bơh Sở Lơh broă- Cau ling sồt să mờ Mpồl bơtiàn càr dê. Mờ càr kung rơ̆p tơnggơs Mpồl Jơi bơtiàn mờ Pin dờn jăt yàng bơh broă tơmŭt bal Mpồl Jơi bơtiàn mờ Mpồl Pin dờn jăt yàng.