Vesak halà chờ pơgồp bal 3 bơta (hơ̆ là kah ngai deh yàng Phờk, gơ gơs kah rơngal mờ sàng goh) bơh yàng Phờk Thích Ca Mâu Ni dê, geh sền là broă lơh niam chài gah jat yàng tài ring lơngai mờ geh dờp ngan ngồn tàm pơrjum dờng Liên hợp quôk ngai 15/12/1999.

Bơh nam 2000 tus tŭ do, Chờ dờng Vesak Liên hợp quôk neh geh bơyai lơh 19 dơ̆, tàm hơ̆ Việt Nam neh bơyai lơh geh cồng nha 3 dơ̆: nam 2008 tàm anih tờm pơrjum dà lơgar Mỹ Đình, Hà Nội; nam 2014 tàm hìu Phờk Bái Đính, càr Ninh Bình mờ nam 2019 tàm hìu Phờk Tam Chúc, càr Hà Nam.

Mờ ală cồng nha hơ̆, Việt Nam pơn jat tai geh rơ wah bơyai lơh chờ dờng Vesak Liên hợp quôk dơ̆ 20 nam 2025 tàm Họk viện gah jat yàng Phờk Việt Nam, kơnhoàl Bình Chánh, ƀòn dờng Hồ Chí Minh.

Là cau uă dơ̆ tus bal dơ̆ bơyai lơh tàm lơgar Việt Nam, Hòa thượng Tiến sĩ Tampalawela Dhammaratana – Phó Củ tịc Duh broă sùm Anih duh broă ală lơgar chờ dờng Vesak Liên hợp quôk ai tơnggŏ bơta kơlôi sơnơng niam ngan tềng đap ală broă lơh ngan bơh lơgar Việt Nam dê tàm broă lơh mpờl gŏ phan lời wơl niam chài jơi bơtiàn mờ gah jat yàng Phờk dê: “Vesak Liên hợp quôk 2025 kuơmàng ngan, ờ mìng tài bơh là dơ̆ 4 Việt Nam bơyai lơh mờ là tài 50 nam ngai tơrgùm dùl dà lơgar, 2 tiah tơrgùm rê dùl gùng. Bơdìh mờ bơta dong kờl niam ngan bơh Cíñ phủ Việt Nam dê gam geh bơta đơng lam bồ bơh Gah jat yàng Phờk Việt Nam dê, mờ lam bồ là Đức pháp củ Thích Trí Quảng. Do là 1 krơh niam, là 1 broă lơh lài mờ gah jat yàng phờk dunia gơtùi sền mờ đòm jat. Añ gŏ là ală broă lơh niam chài mờ uă broă lơh ndai lài mờ tŭ, tàm tŭ mờ tơnơ̆ tŭ chờ dờng lơh gơlik bơta gơ hòi gơ jà ai làng bol tus sền in niam ngan”.

Tus bal Vesak Liên hợp Quôk nam 2025 tàm ƀòn dờng Hồ Chí Minh nam do geh 1 rbô 300 nă cau ala mat ală lơgar là ală cau kơđơng yàng Phờk tàm dunia; ală cau kơlôi sơnơng, ală cau geh bồ tơngoh bơsram sră… tus bơh 85 lơgar, kơnhoàl ù tiah. Bơta do ờ mìng ai gŏ bơngă pin dờn bơh lơgar tờm lơh dê mờ gam ai gŏ gơnoar broă bơh gah jat yàng Phờk Việt Nam dê tàm mpồl bơtiàn jat yàng Phờk dunia.

Chờ dờng Vesak Liên hợp Quôk dơ̆ 20 nam 2025 geh tơngume tờm là Tam klac bal mờ toh glài tài nùs tồr kòn bơnus: Tuệ giác yàng Phờk tài ring lơngai dunia mờ bơtàu tơnguh kơ̆ kơljap jŏ jòng sùm. Chờ dờng geh lơh mờ uă broă lơh tờm bè dơ̆ mut lơh, ală dar cribơyai ală lơgar, dơ̆ rò xá lợi yàng Phờk, broă lơh đơs crih tamya gờm chờ, pơrjum bơta chài bơsram mờ ală broă lơh tìp mat lơh kwèng niam chài gah huềng..

Đơs tàm dơ̆ bơyai lơh chờ dờng, ala mat kwang đơng lam bồ Đảng, Dà lơgar Việt nam, Củ tịc lơgar ồng Lương Cường đơs loh, ală bơta kuơ tờm bơh jơnau bơto sồr lơbơn niam – bồ tơngoh jak mờ yàng Phờk bơto wơl kung gam gàr bè ờs jơnau gơtha gơ wèt mờ kòn bơnus dunia tŭ do. Ală bơta kuơ bè nùs nhơm kờñ gơboh dà lơgar, nùs nhơm tàm toh glài, git wă kis niam bơh yàng Phờk dê neh gơ mut tàm huềng nùs cau Việt Nam dê mờ pơgồp bơnah lơh gơs niam chài jơi bơtiàn Việt Nam. Củ tịc lơgar ồng Lương Cường pà git: “Đảng, Dà lơgar Việt Nam sùm jờng rơ mờ lơh gơlik tơl bơta ƀuơn nàng ală gah jat yàng, tàm hơ̆ geh gah jat yàng Phờk lơh broă tàm jơnau pal jat adat boh lam, lam lơh ờ tam gơl broă lơh ki ngàm mờ sền gàr gơnoar khat gơboh pin dờn, jat yàng bơh tơl nă cau dê mờ sền hơ̆ là bơnàng jă kuơmàng nàng bơt bơtàu mpồl tam klac dờng jơh gùt jơi bơtiàn. Ală cau jat yàng Phờk Việt Nam neh, gam mờ rơp pơn jat tai at tê bal mờ ală cau jat yàng Phờk dunia drơng broă yàng Phờk mờ kòn bơnus dunia in, tài jơnau kờñ bal mờ ring lơngai, lơh bơyô, lơh broă bal mờ bơtàu tơnguh”.

Chờ dờng Vesak Liên hợp Quôk nam 2025 tàm ƀòn dờng Hồ Chí Minh là 1 bơta tờm tàm ală broă lơh dong Việt Nam tă pơgồp uă rlau tai tàm jơnau kờñ rbô nam bơh Liên hợp quôk dê tài ring lơngai mờ bơtàu tơnguh kơ̆ kơljap jŏ jòng sùm.