Do là tơnggume geh đơs tàm Pơrjum tơn jơh broă lơh nam 2024, lam lơh jăt kơnòl broă nam 2025. Nam 2024, kờp jơh phan bơna tàm ù tiah càr Dăk Lăk dê kờp dŭ geh 141 rbô 326 tơmàn đong, gơguh rlau 16% pơndrờm mờ nam 2023. Priă geh bơh tăc phan mờ lơgar ndai geh rlau 1 tơmàn 800 tơlak dolar Mỹ, gơguh mờr 24% pơndrờm mờ nam lài, sơrlèt rlau 15% broă rơndăp lơh. Bal mờ hơ̆, priă lơh geh kờp bal dồ nă cau bơh càr dê kờp dŭ geh rlau 72 tơlak đong dồ nă cau, sơrlèt broă jàu bơh broă rơndăp lơh dê là 68 tơlak đong dồ nă. Dăk Lăk pơn jăt tai sền gròi tàm broă lơh gàr niam broă lơh broă sa mpồl bơtiàn in. Khà hìu rƀah neh gơmù pràn, bơh rlau 9% lồi nam 2023 gơmù gam 6% tàm lồi nam do. Nam 2025, Dăk Lăk lơh geh jơnau kờñ gơguh lơh sa geh khà 8%.

Củ tịc Anih duh broă Làng bol càr Dăk Lăk ồng Phạm Ngọc Nghị sồr ală tiah lơh jăt jơh nùs jơh pràn nùs nhơm geh kơnòl, ai geh gùng dà broă lơh nàng kờñ lơh jăt geh cồng nha broă rơndăp lơh nam 2025 dê, tơngguh pràn, lơh sir jơh tàm lơh jăt ală broă jàu kơnòl broă bơh Jơnau lơh nền tàm pơrjum bơh Pơrjum dờng Đảng ƀộ càr dơ̆ XVII dê.