Broă lơh do là dùl tàm ală broă lơh wèt tus tơn kah 50 nam tơnklàs Tây Nguyên, đah Jum, tơrgùm bal dà lơgar, geh Ƀộ Ling klàng pơgồp bal mờ Tỉñ ủy càr Dăk Lăk bơyai lơh. Tàm pơrjum cri bơyai, ală kwang ling, cau jăk chài bal mờ cau ling yau mblàng bơta tờm lơh geh pha lin do, đơs sùm broă đơng lam jăk chài bơh Ƀộ Cíñ trị bal mờ broă bơceh lơh tàm broă tam lơh, ai geh bơta pràn ni sơna, hòi jà ling sò tơm nàng ling he gơsơ̆t ală pôs ling kwơ màng bè Đức Lập mờ Buôn Ma Thuột, Pleiku mờ Kon Tum.

Cồng nha do neh lơh geh bơta pràn ai tam lơh tơnklàs jơh đah Jum mờ tơrgùm bal dà lơgar. Tus bal mờ đơng lam Pơrjum cri bơyai, Thượng tướng ồng Lê Huy Vịnh, Thứ trưởng Ƀộ Ling klàng pà git, Mpồl bơyai lơh neh gŏ mờr 90 jơnau đơs mờ uă tơngu me niam, geh uă nùs nhơm kơlôi sơnơng pa bè tam lơh pha lin Tây Nguyên dê. Pơrjum cri bơyai là dơ̆ kwơ màng nàng Đảng ƀộ, Gơnoar atbồ bal mờ Làng bol càr Dăk Lăk yal tus ală cau ala măt, ling klàng, làng bol gùt lơgar in git ală cồng nha neh lơh geh tàm nggùl rài bơ̆t bơtàu mờ gơs dờng pràn.