Tàm dơ̆ tìp mat, Củ tịc lơgar đơs nền ală cau lơh sơnơm ngan ngồn là ală “mè lơbơn niam” ờ mìng geh plai nùs kờñ gơboh kòn bơnus lơm mờ gam geh bồ tơngoh, bơta pơn đơl pràn kơ̆ dờn ngan, bơta kong jai bơta bòl glar jơh nùs, wền kơ̆, lơh sir jak ngan kơnòl broă, pơgồp bơnah kwơ màng ngan tàm broă lơh tam lơh tơngklàs jơi bơtiàn, tơrgùm dùl Dà lơgar lài do dê, kung bè tàm broă lơh bơt bơtàu mờ sền gàr kơ̆ kơl jăp Dà lơgar Việt Nam kờñ gơboh bơh bol he dê tŭ do.

Tàm rài pa- rài brồ să, bơtàu tơnguh pas pràn mờ sơlơ bơtàu tơnguh tai bơh jơi bơtiàn dê, Củ tịc lơgar sồr ală kấp, ală gah, is ồn là gah lơh sơnơm pal pơn jat tai tơrgùm bơtàu tơnguh ală anih lơh broă gah lơh sơnơm gùt lơgar; Gàr niam tơl nă làng bol in, bulah tàm ƀòn drà dờng, ƀòn lơgar, halà tiah sar lơgar ngài, tiah nhàr lơgar halà bồt bơklào dà lềng ndrờm geh tus bal mờ ală drơng broă gah lơh sơnơm kwơ màng ngan. Jat Củ tịc lơgar, gah lơh sơnơm ƀòn lơgar pal geh lơh kơ̆ kơl jăp, bơcri priă blơi phan bơna măi mok gơguh jak, pa ngan mờ yờ tơnguh uă bơta chài mpồl cau lơh broă dê nàng gơ gơs tiah lam lài tàm broă sền gàr pràn kơl dang să jan jơh gùt làng bol in tàm ală tiah dê.