Củ tịc Quốk hội ưn ngài Cíñ phủ lơgar Nhờk neh sùm dong kờl mpồl bơtiàn rơlao 600 rơbô nă cau lơgar Việt Nam tŭ do gam kis, bơsram sră, lơh broă tàm lơgar Nhờk; ai tơngŏ, do là bơta tàm tơrbŏ bal kwơ màng ai bơta git gơ̆p lơh bơyô bal đah lơgar Việt Nam mờ lơgar Nhờk dê.

Tàm tơngai tus, Củ tịc Quốk hội ồng Trần Thanh Mẫn kơ̆p kờñ, bàr lơgar pơn jăt tai lơh pràn bơta git gơ̆p Tam klăc bal jŏ jòng tơl ală bơta geh cồng nha mờ mùl màl rơlao tai; tơnguh broă tàm pơgơl mpồl kấp dờng mờ ală kấp tàm jơh ală gah Đảng, Dà lơgar mờ Quốk hội, tìp bal đah ală mpồl lơh broă bàr lơgar, tàm hơ̆ uă ngan là đah Mpồl tam klăc nghị sĩ lơh bơyô đah lơgar Nhờk mờ lơgar Việt Nam bal mờ Mpồl Nghị sĩ lơh bơyô bal đah lơgar Việt Nam mờ lơgar Nhờk; lơh pràn kơl dang broă lơh bal niam chài, lòt nhơl mờ tìp bal làng bol đah bàr lơgar dê.