Dơ̆ tơngkah kir sơnrai bơh Mpồl Mblàng yal bơto bơtê mờ Hòi jà Làng bol Dà lơgar, Ƀộ Lơh sơnơm bơyai lơh dờng mờ ki ngàm ngan. Ala măt đơng lam Đảng, Dà lơgar, Củ tịc Quôk hội ồng Trần Thanh Mẫn cih dờp mờ jờng rơ, đơs niam ngan bơta lơh ngan, phi să, tă pơgồp dà kơlhề bơh mpồl cau lơh sơnơm mờ gah Lơh sơnơm dê neh lơh geh tàm tơngai lài.

Củ tịc Quôk hội ồng Trần Thanh Mẫn đơs nền, Đảng, Dà lơgar he sùm gĭt nền, sền gàr, dong kờl mờ tơngguh uă pràn kơldang să jan ai Làng bol in là dùl tàm ală kơnòl broă kwơmàng, ai lài khà dùl; neh mờ gam geh lơh gơs adăt boh lam wil tơl, di tŭ, dong kờl gah Lơh sơnơm bơtàu tơngguh pràn kơldang tàm tŭ tơngai pa. Củ tịc Quôk hội pin dờn là, mpồl cau lơh sơnơm, kwang bàng, cau lơh broă gah Lơh sơnơm pơn jăt tai tam klăc, lơh broă bơceh lơh, lơh geh broă rlau tai; sùm dipal “Cau lơh sơnơm bè mè lơbơn niam”, lơh gơs “Jơnau đơs crih jờng rơ bơta khin cha jak chài cau ling àu kò dê” mờ Làng bol sùm kơ̆p gơn, kơ̆p kơnờm.