Ngai 16/07, Mpồl duh broă Làng bol càr Dăk Lăk khoă X, tơngai lơh broă bơh nam 2021- 2026 neh ring bal broă jàu, broă rơndăp lơh bơtàu tơngguh lơh sa – mpồl bơtiàn, sền gàr niam dà lơgar, lơngăp lơngai, jơh nùs lơh geh jơnau kờñ gơguh 8% jơh gùt nam do mờ lơh nền uă tơngume kwơmàng nàng kờñ di tŭ tă bơsong kal ke ai mpồl lơh broă gơnoar ătbồ ƀòn lơgar bàr kâp lơh broă kơ̆ kơl jăp, geh cồng nha. 6 nhai bồ nam do, lơh sa – mpồl bơtiàn càr Dăk Lăk gàr sùm khà gơguh đau, geh rlau 7%, jơh rề dia dà lơgar geh rlau 8 rbô 700 tơmàn đong, kờp jơh priă geh bơh tăc phan mờ lơgar ndai 1 rbô 520 tơlak dolar Mỹ…6 nhai lồi nam, Dăk Lăk pơnđơl lơh ngan geh khà gơguh lơh sa 8,64%; gơmù khà hìu rƀah bơh 3% rlau hơđang…

Tàm dơ̆ pơrjum, Mpồl duh broă Làng bol càr Dăk Lăk neh sền sơ wì, lơh nền, ring bal ală jơnau lơh nền tàm pơrjum: tam gơl jơnau kờp dŭ tă dơ̆ ngui kes priă càr, tam gơl broă rơndap lơh bơcri priă dà lơgar; bơ tơl jơnau kờp dŭ tă dơ̆ ngui sùm ai ală broă lơh jơnau kờñ dà lơgar in; ai tơlik ală gùng dà broă lơh, bơta dong kờl kwang bàng, cau lơh broă sa priă nhai dà lơgar, cau lơh broă tàm Anih tờm sră pơ àr gơnoar atbồ pa; cih khà tă dơ̆ ngui ai ală broă lơh niam chài, đơs crih tamya, pơlam lơh sa mờ măi mok in.

Jat Jơnau lơh nền tàm pơrjum mờ Mpồl duh broă làng bol càr Dăk Lăk pa ring bal, kwang bàng, cau lơh broă sa priă nhai dà lơgar mờ cau lơh broă gơ wèt ală anih lơh broă Đảng, dà lơgar, Mặt trận dà lơgar VN, ală mpồl cíñ trị - mpồl bơtiàn geh jàu kơnòl broă tus lơh broă tàm anih tờm sră pơ àr gơnoar atbồ càr Dăk Lăk (tơnơ̆ tŭ tơmut bal mờ càr Phú Yên) mờ anih tờm sră pơ àr gơnoar atbồ kâp sàh rơp geh dong kờl priă lòt rê, priă ơpah hìu mờ bơnah priă dong kờl dùl dơ̆. Mùl màl, cau lòt lơh broă tàm anih tờm sră pơ àr gơnoar atbồ càr rơp geh dong kờl bơh sơn rờp 2 tơlak đong mờ pah nhai dong kờl 2 tơlak đong priă lòt rê, 3 tơlak đong priă ơpah hìu. Gơ wèt mờ cau lơh broă tàm anih tờm sră pơ àr gơnoar atbồ kâp sàh, khà dong kờl geh kờp jat gùng ngai lòt rê, tam gơl bơh 500 rbô tus 2 tơlak đong dùl nă cau dùl nhai mờ 1 tơlak 500 rbô đong dùl nă cau dùl nhai priă ơpah hìu, dilah ơm ngài rlau 30 kơi sồ mờ 1 tơlak đong dong kờl dùl dơ̆. Tơngai lam lơh broă lơh dong kờl là 12 nhai.