Tơnơ̆ mờr dùl nam tàm bơyai mờ cau lơh broă bal, tus nhai 08 nam do, Kông ty Kong kơnòl nă să is Lơh gơlik – Kă bro phan – Drơng broă ala Việt Thắng, sàh Ea Kar, càr Dăk Lăk neh tăc geh cồng nha gơnru phan 25 rbô yô zĕp đù cù tàm hìu tus drà lơgar Mỹ. Bè hơ̆, tơnơ̆ uă nam tàm pơrlòng geh cồng nha mờ khŏ zĕp tàm lơgar Lo, Philippine mờ bàr pe lơgar tàm tiah đah Jum măt tơngai lik câu Á, mpồl lơh sa kă bro làng bol dê lơh is kâp kơnhoàl- sàh càr Dăk Lăk dê neh lòt ngài nggùl đah plai ù, crăp rơcăng mờ bơta kơn jơ̆ tàm pơrlòng pa. Mò Nguyễn Thị Dung, Kwang Lam bồ Kông ty do pà gĭt, nàng tàm pơrlòng jai tàm drà khà dùl dunia bè Mỹ, bơdìh mờ bơta gĭt wă măy mŏk, ătbồ broă, mpồl lơh sa kă bro pal crăp rơcăng bè priă jền nàng tơngguh pràn jak lơh gơlik, lơh geh di tơngai hơ ală sră dan blơi phan pa. Là năc geh bơngă pin dờn sùm tàm rlau 20 nam do bơh ală anih priă jền tàm ƀòn lơgar dê, mò Dung dòn là, Việt Thắng rơ̆p geh tơl bơta pràn.

“Tŭ mờ năc dan blơi phan ală gơnru phan pơn jăt tai dan Việt Thắng pal rề ơnàng hìu măy mờ bơcri priă tai blơi ală măy mŏk nàng lơh geh tơl bơta pràn lơh gơlik phan kĭ mờ cau lơh broă bal. Bơtuah ngan là geh Agribank càr Dăk Lăk sùm lòt bal dong kờl, ai tơl bơta nàng bol hi càn priă di mơ tơngai bơcri tàm măy mŏk phan ngui mờ hìu măy. Anih priă jền ai càn ai tơl bơta ngan, sră nggal mhar, ƀươn soh ờ kơn jơ̆ mờ ală dơ̆ dờp dồs ƀươn soh”.

Gơ wèt mờ Kông ty Kong kơnòl nă să is Kă bro phan Drơng broă ala Tăc mờ blơi phan mờ lơgar ndai Thế Kỷ, sàh Dray Bhăng, càr Dăk Lăk, gùng lòt bơh sơnđờm mŭt lơh broă ròng phan tus gơgơs dùl mpồl lơh sa kă bro tăc phan mờ lơgar ndai mờ bơta rơcăng lài tŭ ngui priă bơcri. Mò Lê Thị Tuết Sương, Kwang Lam bồ Kông ty yal, bơta ƀươn bơh mpồl lơh sa kă bro dê là gơtùi lơh niam bơnàng jă ròng phan, geh ai tơl bơta càn priă ƀươn ƀoài, tơnơ̆ hơ̆ ai ntrờn priă rơc ăng lài tus gah tăc phan mờ lơgar ndai.

“Kờp jơh priă añ gam càn anih priă jền dê là 3 tơmàn đong. Bơh chờm añ ai jăt tơl dơ̆, nàng bơcri lơh wàng ròng, kòn sơntìl, lơ̆. Tơnơ̆ tŭ ai wơl geh priă bơcri bơh ròng siam iar den ùr bơklau añ hơ̆ sồng lòt bơcri kă bro hờ đah bơdìh”.

Bal mờ bơta krơi is bơh bă ù kơnờm tàm bơta pràn broă lơh sa sươn sre lơh bơnàng jă, bơnah uă ală mpồl lơh sa kă bro, hìu kă bro tàm Dăk Lăk neh sơnđờm mŭt lơh broă bơh broă lơh sa sươn sre, halà bơcri priă broă lơh sa sươn sre bal mờ gah kă bro tờm. Ngan tài bè hơ̆, priă càn broă lơh sa sươn sre geh gơnoar broă kwơmàng tàm dong kờl bơtàu tơngguh lơh sa làng bol dê lơh is, jăt nùs nhơm Jơnau lơh nền tàm pơrjum 68 Ƀộ Cíñ trị dê. Mờ nàng lơh jăt gơnoar broă do, bơdìh mờ ală anih, cơldŭ drơng broă kă bro, anih priă jền gam pơgồp bal mờ ală mpồl mpồl cau lơh gĭt nđờ rơhiang jơnum càn priă tàm ală thôn, ƀòn. Mò H Ley Sia Êban, kwang bàng cau ùr sàh Dray Bhăng, càr Dăk Lăk pà gĭt, bơh ală mpồl mpồl cau tàm ƀòn lơgar, ală jơnum càn priă neh dong kờl làng bol geh cồng nha.

“Bơh broă bơ̆t bơtàu ală jơnum càn priă den cau tàm mpồl kung bè làng bol neh càn geh ƀươn ƀoài rlau mờ ală priă càn, bơsong jơnau kờñ he dê. Rlau mờ hơ̆ tai, Agribank kung neh rề ơnàng geh priă càn uă rlau nàng lơh geh jơnau kờñ rề ơnàng kă bro bơh làng bol dê. Tŭ mờ geh priă jền den làng bol pin dờn bơtàu tơngguh kă bro, bơtàu tơngguh lơh sa hìu bơnhă dê”.

 Jăt ồng Lê Văn Thịnh, Kwang Lam bồ Agribank càr Dăk Lăk, tàm bơta càr Dăk Lăk neh rềp bal mờ dà lềng, tăc mờ lơgar ndai phan lơh geh bơh sươn sre tàm càr sơlơ geh uă bơta ƀươn, anih priă jền rơ̆p geh ală tam gơl di tŭ nàng dong kờl lơh niam bơta ƀươn do.         

“Mờr tus, bol hi geh ală broă rơndăp lơh loh làng ngan mờ ală tam tìp ală cau năc uă rlau, tơrgùm tàm năc càn priă gơrềng tus tăc phan lơh geh bơh sươn sre mờ lơgar ndai. Hơ̆ là dùl tàm ală broă tờm bơh ù tiah càr Dăk Lăk dê. Tŭ do neh tam tìp mờ neh geh bàr pe jơnau hơ ngan ngồn mờ gam lơh ală sră nggal jăt broă pơlam lơh. Digơlan tàm nam 2025 do den kung rơ̆p pal gơguh, jơh nùs lơh jăt sơrlèt broă rơndăp lơh Ƀộ Priă jền dê jàu”.

Ờ ƀươn ƀoài là ai càn priă, ală anih priă jền tàm càr Dăk Lăk neh mờ gam “lòt bal” geh cồng nha mờ mpồl lơh sa kă bro mờ làng bol. Bơh ală sră pơrgon tăc phan lơh geh bơh sươn sre tus dunia tus ală broă lơh tơrlòng lơh sa hìu bơnhă tàm ală ƀòn lơgar, jơh ală gam pơgồp bơnah bơtàu tơngguh kơ̆ kơl jăp lơh sa ƀòn lơgar, bơtàu tơngguh uă rài kis làng bol mờ đơs nền gơnoar broă tờm kwơmàng bơh lơh sa làng bol dê lơh is.