Jăt tàm jơnau yal mờ cribơyai, Tổng Ƀí thư đơs sùm, broă lơh bơyai lơh, wă rò pal wil tơl, is ồn sền gròi ală cau ala măt là cau geh dà kơlhề, cau dờng sơnam, cau dờp bơta dong kờl mpồl bơtiàn dê. Do là tŭ nàng tơngŏ bơta kah rơngal bơh Đảng, Dà lơgar dê gơ wèt mờ ală cau tă pơgồp ai dà lơgar in.

Tổng Ƀí thư tơngkah, mpồl làng bol mờ năc lòt nhơl rê tus Hà Nội dơ̆ bơyai lơh rơ̆p uă ngan, gơ jăt bal jơnau kờñ ơm bĭc, sàu sa, lòt rê, tus bal dơ̆ bơyai lơh. Tài bè hơ̆, Mpồl Sồr lơh Dà lơgar mờ ƀòn dờng Hà Nội pal rơcăng uă broă rơndăp lơh wă rò, geh bal tŭ trồ tiah ờ niam. Bal mờ bơta wil tơl, sền dờng màng ki ngàm, broă lơh lơngăp lơngai, niam lơngăp lơngai pal geh lơh niam, nàng ală broă lơh tơngkah kir sơnrai gơgơs ngai chờ dờp bơh jơh gùt làng bol dê.