Tàm nùs nhơm chờ gờm Kăc màng nhai Phàm mờ Sơn tờm Dà lơgar ngai 02 nhai 9, drim òr (20/08), tàm Hìu Pơrjum Dà lơgar, dơ̆ Pơrjum tơnkah 80 nam ngai crơng gơs Cíñ phủ (28/8/1945 - 28/8/2025) geh bơyai lơh tơrgùm bal. Yal wơl rài lài do, Thủ tướng Cíñ phủ ồng Phạm Minh Chính đơs loh: Ngai 28 nhai 8 nam 1945, Cíñ phủ ing lơgar Việt Nam Dân củ Kộng hoà neh tơlik jơnau Yal bơr tềng đăp mờ làng bol gùt lơgar kung bè gùt dunia bè broă crơng gơs Cíñ phủ pa mờ yal khà măt 15 nă kwang bàng geh Củ tịc Hồ Chí Minh lơh Củ tịc, ai tơngŏ broă crơng gơs Cíñ phủ Kăc màng sơnrờp ngan tàm rài git nđờ rơbô nam bơ̆t bơtàu mờ sền gàr dà lơgar bơh jơi bơtiàn dê.

Tàm 80 nam, neh sơrlèt mờ uă tơngai kal ke, glar bòl mờ uă bơta lòng, mơya tềng đăp mờ broă đơng lam jăk chài bơh Đảng, Cíñ phủ bơh ală tơngai lơh broă neh ai tơngŏ loh làng nùs nhơm lơh ngan uă, lơh ngan dờng, lơh broă pràn, bal mờ làng bol, cau ling gùt lơgar lơh geh ală cồng nha dờng màng, geh kwơ bơh lài tus tŭ do tàm jơh ală gah broă. Pal kah ngan, Cíñ phủ tơrgùm lơh pràn, lơh geh cồng nha gùng dà broă lơh rơndăp tăp sèng mpồl lơh broă cíñ trị gơmù niam, lơh broă pràn, geh cồng nha mờ bơ̆t bơtàu broă lơh gơnoar atbồ ƀòn lơgar 2 kấp mờ Bơtàu tơnguh tơl ală bơta dà lơgar. Đơs tàm dơ̆ đơng lam pơrjum, Tổng Ƀí thư ồng Tô Lâm sồr mờ kơ̆p kờñ ală kwang bàng pơn jăt tai lơh broă bal mờ Cíñ phủ pràn lơh nàng ai Dà lơgar mŭt tàm rài pa, Rài brồ să bơtàu tơnguh pas gơs, gơguh jăk, tơl pràn jơi bơtiàn.