Tàm pơrjum, ala mat ală mpồl lơh sa kă bro Việt Nam mờ Lo neh cribơyai bè broă lơh chồl tơnguh lơh sa mờ gàr niam bơta kơ̆ kơljap jŏ jòng sùm broă lơh tac phan hờ lơgar ndai tàm tơngai tus. Tàm hơ̆, ală mpồl lơh sa kă bro Việt Nam kơp kờñ geh dong kờl git di tŭ ală broă dong kờl, jơnau sồr pal jat bè bơta chài măi mok, jơnau sồr pa mờ jơnau sồr bè kloh niam phan sa pa bơh lơgar Lo. Mờ kung geh gah yal tơnggit sùm nàng di tŭ tam gơl broă lơh sa.

Bè đah lơgar Lo, uă mpồl lơh sa kă bro đơs là, Gia Lai pal sền gròi rlau tai tus bơta kơ̆ kơljap bơh mpồl tac phan dê, bơta niam ndrờm bal mờ bơta pràn lơh gơlik phan niam rlau nàng kờñ tơnguh priă jền lơh geh. Mò Lư Lệ Phương, Kwang lam bồ kă bro Tập đoàn bơcri priă Vịñ Bắc Bộ, càr Quảng Tây, lơgar Lo pà git: “Gơ wèt mờ mpồl lơh sa kă bro den sền gròi ngan tus tiah lơh gơlik mờ phan bơna bơh đah lơgar Việt Nam dê. Geh uă phan li la ngan. Ngai do, tus do, añ kờñ jòi git tai bè tiah lơh gơlik phan bơh lơgar Việt Nam dê bè broă lam lơh bè lơi, atbồ bè broă rơndap lơh tac mờ blơi phan bơh lơgar ndai. Dilah kờñ gơguh khà phan tac tus lơgar Lo den pal geh bơta jat sền, lơh gơlik, ơn tàm kơldung phan bơna loh làng”.

Tàm pơrjum, ală gah ring bal uă ngan bè broă kờñ pal bơt bơtàu ală gah tàm tơrbŏ bal tơn, tơrmù ƀà bơta lơh kòn gùng, mờ kung chồl tơnguh lơh broă bal tàm gah logistics. Mò Nguyễn Thị Diễm Hằng, Kwang lam bồ dờng Kông ty kổ phần Vinanutrifood Bình Định pà git, tŭ do neh geh uă mpồl lơh sa kă bro Việt Nam mut uă tàm drà kă bro lơgar Lo mờ git loh ală broă lơh geh gơ rềng. Do là bơta ƀuơn dờng ngan nàng bơtàu tơnguh tiah tam phan lơh jat jơnau sồr tàm càr Gia Lai: “Bol hi neh git là, bơta kuơmàng ngan rlau jơh là bơta loh làng bơh broă atbồ tiah tam tus hìu măi lơh gơlik phan. Bơta kuơmàng ngan rlau jơh bol he dê là tac ală phan mờ lơgar Lo kờñ. Bol hi ngui AI, tơmut tàm jơnau yal tơnggit bơh ală măi mok sồr lơgar Lo dê, ală jơnau kờp dŭ kàl tam phan gờñ, kàl lơh sa bè khà lơh geh pơgồp bal mờ tiah tam phan tàm Việt Nam nàng lơh gơlik ală phan di kàl mờ di, tơl khà ai drà kă bro in”.

Tàm pơrjum, neh geh 7 sră cih kah lơh broă bal geh kĭ đah mpồl lơh sa kă bro càr Gia Lai mờ mpồl lơh sa kă bro lơgar Lo. Ồng Nguyễn Tuấn Thanh, Phó Củ tịc Duh broă sùm Anih duh broă Làng bol càr Gia Lai đơs nền, càr gam tơrgùm lơh sir ndrờm bal ală bơta pal geh nàng lơh gơlik anih ƀuơn ƀuài ngan rlau jơh ai mpồl lơh sa kă bro in, tàm hơ̆ geh ală cau bơcri priă lơgar ndai mờ mpồl lơh sa kă bro lơgar Lo: “Càr Gia Lai sền gròi tus broă tơrgùm lơh gơs phan bơna gùng lòt tàm gùt càr, phan bơna ală tiah lơh sa mờ măi mok, broă lơh tam gơl wơl sră pơ àr gơnoar atbồ bè bơcri priă bơt bơtàu, dia, sền sơ wì dia phan lik mờ mut tàm lơgar. Tus mờ Gia Lai, ală mpồl lơh sa kă bro, ală cau bơcri priă rơp geh lơh tơl bơta ƀuơn nàng lam lơh rơndap broă lơh geh cồng nha mờ bơtàu tơnguh kơ̆ kơljap jŏ jòng sùm”.

Tŭ do, càr Gia Lai geh mờr 1 ơlak lồ ù lơh sa suơn sre mờ ală tiah mìng tam dùl bơta phan dờng ngan. Tàm hơ̆, kơphe là chi tam tờm ngan mờ rlau 107 rbô lồ, khà lơh geh pah nam rlau 333 rbô tấn. Ală bơta chi tam bè sầu riêng, tiêu, điều, kau su, prìt, plai màk, bùm lô, lơ u, mrĕ… kung geh bă ù tam bơh 2, 3 rbô tus git nđờ jơt rbô lồ, lơh jat ală jơnau sồr ai tac hờ lơgar ndai in.