Kơnhoàl ù tiah bơnơm Khánh Sơn, Khánh Vĩnh tiơng pơnrơ mờ ală sươn plai sầu riêng, măng kụt, pơnăt Thái, ƀơ, prìt. Is ồn, sầu riêng Khánh Sơn neh lơh gơs măt kă bro tàm drà, gơgơs phan bơna cèng wơl priă jền lơh geh uă ai cau lơh broă sa in. Ală sươn chi sa plai tơlir ñhơm niam ngan, kàl lơi phan sa hơ̆, ờ mìng là anih lơh gơlik phan lơh gơlik bơh sươn sre lơm mờ gam là “phan kwơ geh is lòt nhơl” kwơmàng ngan. Bơdìh mờ sươn chi sa plai, tiah bơnơm Khánh Hoà gam geh ală dà dờng dà croh, ñrùh dà liang dà, brê gam bè ờs bơh yau lơh geh ală bơta niam ngan nàng bơtàu tơngguh lòt nhơl ƀòn brê bơnơm mpồl bơtiàn. Pơgồp bal mờ rài kis niam chài ờs mờng bơh yau bơh làng bol kòn cau Rơglai, Rơđê, Tày, Nùng dê, ƀòn lơgar gơtùi lơh uă phan bơna lòt nhơl krơi is ngan bè tus bal dơ̆ lơh chờ lơh yàng, sền dròng cing jañ mồng, phan sa kòn cau dồ êt nă cau, ơm tàm homestay tàm hìu rơng. Bi Nguyễn Thị Thu ơm tàm Nha Trang sền gŏ tŭ tus xã tiah bơnơm Khánh Sơn lòt nhơl bè do: “Hìu bơnhă añ nam do lòt tus Khánh Sơn dơ̆ bàr rao. Ù tiah ƀòn lơgar den niam, trồ tiah mrềt lơngơm. Plai chi nam do gơlơh bè uă ngan, măng kụt, sầu riêng gam mŭt tàm kàl tơnhàu. Bal mờ sa plai chi, hìu bơnhă añ gam lòt guh ñrùh dà Tà Gụ, tềng hơđăng hơ̆ ñrùh dà niam, croh dà mrềt lơngơm ngan. Chi dờng uă, brê gam wơl bè ờs bơh yau mrềt lơngơm ngan. Làng bol đềt mềr ngan, drơng broă niam ngan”.  

  Ồng Nguyễn Trí Dũng, Phó Củ tịc Anih duh broă Làng bol sàh Tây Khánh Sơn pà gĭt, tàm sàh neh geh bàr pe hìu bơnhă tam gơl broă lơh kă bro, bơcri priă drơng broă ñô sa, lòt còp cau lơh sươn nàng drơng năc lòt nhơl in.

“Tàm ù tiah sàh Tây Khánh Sơn geh bơta ƀươn là ală cau lơh sươn dờng, tàm hơ̆ geh ală ù tiah ƀòn lơgar niam, trồ tiah mrềt lơngơm, lơh geh tơl ală bơta ai năc lòt nhơl in lòt còp, sa phan sa bơkah is Khánh Sơn dê kung bè phan sa kơnhoàl ù tiah dê. Bơh hơ̆ gơtùi gơhòi gơ jà năc lòt nhơl, mơkung pơgồp bơnah tăc bro phan lơh geh bơh sươn sre ai làng bol in”.

Nàng lơh broă geh cồng nha, càr Khánh Hoà pal rơndăp ù tiah tiah lòt nhơl mpồl bơtiàn gơ jăt bal mờ broă lơh sa sươn sre, rwah phan bơna pràn tờm bè sầu riêng Khánh Sơn, pơ ò Cam Lâm, plai bung Diên Khánh. Làng bol geh hòi jà lơh bal gơgơs mpồl lơh broă bal nàng tơngguh uă bơta niam drơng broă. Càr kung pal bơcri phan bơna bơ̆t bơtàu, dong kờl lơh homestay, tiah lòt sền gŏ, mơkung bơsram tàp bơta chài drơng broă, đơs loh ai cau in gĭt, dà đơs lơgar bơdìh ai làng bol in. Kwơmàng rlau là tàm tơrbŏ dơ̆ lòt nhơl, lơh gơs gùng lòt “dà lềng bồt bơlào Nha Trang – sươn chi Khánh Sơn – niam chài Khánh Vĩnh”, pơgồp bal yal tơnggĭt uă tàm bơnàng jă sồ mờ bơh mpồl lơh sa kă bro lam năc lòt nhơl nàng gơhòi gơ jà năc lòt nhơl. Ồng Nguyễn Duy Quang, Kwang Lam bồ Sờh Broă lơh sa sươn sre mờ Tiah ơm kis càr Khánh Hoà pà gĭt: “Dilah ală kơnhoàl ù tiah bơnơm tŭ do tam geh ală bơta chi tam mờ pơgồp bal mờ lòt nhơl ƀòn brê bơnơm den rơ̆p lơh gơs dùl ròt lòt nhơl nàng bơtàu tơngguh gah lòt nhơl càr Khánh Hoà. Lòt nhơl ƀòn brê bơnơm gơ jăt bal mờ anih lơh sa sươn dờng bal mờ phan bơna OCOP rơ̆p tơnguh uă rài kis làng bol in. Tŭ lòt nhơl pơgồp bal bơh tiah dà lềng lòt tus tiah bơnơm den rơ̆p geh ală phan bơna OCOP, ƀòn broă lơh, anih lơh sa sươn dờng, lơh gơlik bơta gơdan pa ai bơtàu tơngguh lòt nhơl tàm tơnơ̆ do in”.

Bal mờ bơta ƀươn brê bơnơm li la, sươn chi mbòr ngan plai mờ rài kis niam chài krơi is, Khánh Hoà gam ơm tềng đăp tŭ niam nàng lơh pa rùp rài lòt nhơl, ờ mìng dŏ jơng năc lòt nhơl dê bơh dà lềng bồt bơlào mờ gam mờ bơh ală lòt sền gŏ tơlir, rềp mềl, mờ krơi is. Lòt nhơl mpồl bơtiàn dilah geh rơndăp ù tiah dồ bă niam, bơtàu tơngguh kơ̆ kơl jăp rơ̆p gơgơs “mpồng” lam năc lòt nhơl jòi gŏ ngan ngồn niam chài mờ brê bơnơm Khánh Hoà, lơh gơlik bơta gơn kơnờm pa ai lơh sa ƀòn lơgar in.