Lơh niam broă lơh gĭt gŏ nùs nhơm bồ tơngoh cau ùr bơh tàm ƀòn lơgar nàng rcang tă pơgồp jơnau đơs, lam lơh geh cồng nha ală srơh. Do là tơngume geh cribơyai tàm Pơrjum Tam pà bal mờng chài, jơnau sồr đơs gùng dà broă lơh tàm broă lơh gĭt bơta bồ tơngoh cau tàm mpồl cau ùr tàm ƀòn lơgar nam 2025 bơyai lơh mho ngai 21/03 tàm càr Dăk Lăk.

5 nam do, ală kấp mpồl cau ùr tàm càr Dăk Lăk neh cri tơrña bơyai geh cồng nha rlau 2 rơbô dơ̆ broă geh gơrềng tus cau ùr, kơnòm dềt, gàr niam, rề ơnàng rlau 300 broă lơh, mpồl lơh broă geh cồng nha. Bơh hơ̆, pơn jờng oh mi sền gĭt jơnau yal mờ jơnau đơs mpồl bơtiàn dê di tŭ, di ngan, pơgồp bơnah bơt bơtàu ƀòn lơgar, ƀòn, sơnah ƀòn niam chài. Tàm pơrjum, cau ala mat kung sơñio ală gah jơnau yal tơngĭt nàng gĭt gŏ gờñ ală broă gơlik geh bè ală bơta tam lah tam ring, ờ ring bal halà ală bơta lơh roh bơta kơ̆ kơl jăp. Bơh hơ̆ đơs broă lơh nàng rcang lài kơryan, sŏk sền, kơryan ală jơnau yal tìs ờ ngan, đơs blăc pơrlồm, pơrlơ̆ dră gơrềng tus bơta ờ niam tus mờ cau ùr.