50 nam tơnơ̆ ngai tơngklàs, bơh dùl ƀòn drà dờng tam lơh, tơnơ̆ nggùl rài Buôn Ma Thuột, càr Dăk Lăk brồ să gơgơs tiah tờm kơphê Việt Nam dê, duh hồl chờ chờr săp ntas cing mồng chờ hờp wă rò năc lòt nhơl tus bal Lơh chờ Kơphê. Do kung gơgơs là dùl tiah tờm lơh sa, jak chài măy mŏk broă lơh sa sươn sre brê bơnơm Tây Nguyên dê. 50 nam lài, dơ̆ tam lơh Tơngklàs Buôn Ma Thuột là sơnđờm bơh sơnrờp ai kàl prang pha lin dờng in, den Buôn Ma Thuột niam bơnĕ ngai do là cồng nha nggùl rài ring lơngai, lơngăp lơngai is mờ tơrgùm dùl dê. Bơh ndo, ƀòn dờng sơnđờm gùng lòt pa, gùng lòt bơtàu tơngguh dê mờ mŭt gơrờm bal dê, gơgơs anih tus bơh kơphê dunia dê.

Lài hơ̆, ràng tơlik rùp bơta niam chài Rùp să bơtòm tơrgùm neh sơnđờm lơh tàm ƀòn dờng Buôn Ma Thuột, chờ hờp bal mờ nùs nhơm duh hồl hô hơng bơh ală broă lơh tàm tơngume Lơh chờ Kơphê dơ̆ 09 gam geh lơh tàm Dăk Lăk dê. Geh lơh bơh tŭ do tus jơh ngai 15/03 tus, ràng tơlik “Rùp să bơtòm tơrgùm” ơn tàm sươn bơkàu ƀòn dờng Buôn Ma Thuột, tàm gùng lòt tờm tus ală anih geh lơh ală broă lơh tàm tơngume Lơh chờ Kơphê; ơn pơdơng 150 pang rùp niam chài pơnrơ bơh ală cau chàu cùp rùp tàm 5 càr: Dăk Lăk, Dăk Nông, Gia Lai, Hải Dương mờ Phú Yên dê.

Ală rùp tơnggŏ loh ngan ală măt tiah tiơng pơnrơ, bơta niam krơi is, pơnrơ, mờ niam chài mùl gŏ is bơh tơl ù tiah dê. Do kung là broă lơh geh kwơ ngan chờ hờp wă rò 50 nam Tam lơh pha lin Buôn Ma Thuột, tơngklàs càr Dăk Lăk; pơgồp tai broă lơh li la tàm tơngume Lơh chờ Kơphê Buôn Ma Thuột dơ̆ 09, nam 2025.