Tơnơ̆ 50 nam tơngklàs, bơh 1 càr tiah kơh bơnơm rơƀah, bơrngơl gơla, lơh sa suơn sre bè ờs lơm, càr Dăk Lăk neh brồ guh gơ gơs tiah bơtàu tơnguh đau, anih tờm lơh sa, cíñ trị tiah Tây Nguyên dê. Lơh sa bơh càr dê gàr niam khà gơguh lơh sa kơ̆ kơl jăp, kờp bal tàm 10 nam do lơh geh 6,15% dồ nam. Broă rài lơh sa ngai sơlơ rề ơnàng mờ bơtàu tơnguh, tus nam 2024 lam lài tàm tiah Tây Nguyên, ơm dơ̆ 2 tàm tiah jat kềng gah dà lềng tàm gùl lơgar mờ Tây Nguyên.

Đơs tàm dơ̆ tơngkah 50 nam tam lơh pha lin Buôn Ma Thuột, Phó Thủ tướng Cíñ phủ ồng Trần Hồng Hà sồr càr pơn jat tai lơh jat niam gơnoar broă anih tờm bơtàu tơnguh tàm tơrbŏ bal tiah Tây Nguyên tàm jơh ală gah. Tàm hơ̆, bơt bơtàu ƀòn dờng Buôn Ma Thuột ngan ngồn là tiah drà tờm, là mpồng mut bơh tiah Tây Nguyên dê, mut gơrờm bal mờ lơh sa ală lơgar, là ƀòn dờng tơlir - ƀòn brê bơnơm - ngăc ngar- bơhiàn niam chài, rùp rài lam lài bè dùl tiah drà mờ tàm hơ̆ pơgồp bal mờ niam chài mờ brê bơnơm geh is. Phó Thủ tướng kơ̆p kờñ mờ pin dờn Đảng ƀộ, gơnoar atbồ, ling klàng mờ làng bol ală jơi bơtiàn tàm càr rơ̆p lơh jat niam nùs nhơm tam lơh pha lin Buôn Ma Thuột gam sùm, cơnđoà mut tàm rài pa, bơtàu tơnguh pas sơm, ram mhŭ mờ chờ hờp.